AY GENERAL CAMP

Karleh (March 18-20) khian AY General Camp, Tamdil-ah neih a ni dawn a. Kal turte chuan buhfai no 5 leh Rs 150 thawh tur a ni a. Bus pakhat hman a ni ang a, a bakah Private motor eng emaw zat a kal bawk ang.
Tunkar chho-ah hian Member-te inah kal kualin General Camp kal turte hming khawn a ni dawn a, kal tum theuh turin Member zawng zawngte ngen vek kan ni e.
Zirtawp zing dar 9:00-ah kal turte chu Conference Office kawtah awm tawh tur a ni e.

AY PICNIC & BLANKET SUK

Sunday ni (13 March) hian AY-in tlawng luiah intihhlim pahin Blanket suk hnatlang neih a ni dawn a, thalaite’n Sabbath ral zanah suk tur an rawn khawn dawn a, Blanket suk tur neite chuan lo lakhawm sa turin min ngen a ni. Member-te a tam thei ang ber kal turin beisei leh ngen kan ni. Conference Motor-in kal tur a ni ang.

YEARLY PLAN-A TELLO ICU ~Diktea Pa

Lunglei atangin a tute inneih hmanga Keifangah kal turin Diktea Pu, Elder C. Thangliana chu Feb.14, 2011(Monday) khan Aizawl a rawn thleng a. Pa taima tak mai a ni a, hnathawh tur ruahman engemawzat a neih thu min hrilh a. Pa(Mushroom) khawi a tum avangin Horticulture Department-in Chite Lui kama Pa khawina hmunpui an siam chu Feb.15, 2011(Tuesday) zing khan kan pahnihin kan va tlawh a: Pa khawina tur Polythene tha chi chu Rs. 2,000/- man lai a lei nghal a: Keifang a kal zawh a tan nghal mai a rilruk a ni. Feb.15, 2011 chawhnu lamah Keifang lam panin Sumo-in a chhuak ta a; Tluang takin inneih an hmang dawn emaw kan tih laiin Feb.16(Wed) a lo inherchhuah meuh chuan thu thinthawng tak kan dawng ta tlat mai! A tuk zingah chuan, inneihna inkhawma tel turin a zan mu chu kaihthawh theih a ni ta lo! Hlim taka Keifang lam pana kal chhuak Diktea pu kha engmah hre lovin a rawn let a, rilru a na duh hle mai.

Aizawl Civil Hospital Casualty Ward-a zan khat kan riah hnuin ICU-ah sawn luh kan ni ta a. ICU-ah hian kan chhung zinga mi an awm ve ang tih kan lo hisap ngai reng reng lo a! Awmdan thiam a har a, rilru a buai duh hle mai. Natna te, chhiatna te, thihna te leh tawrhna te hi midang chung chauha thleng tur emaw tih a awl hle mai. Aizawl Civil Hospital han riahchilh meuh chuan mit a var uarh uarh mai.

Then leh rual leh chhungkhat lainate leh kohhran mite thatzia ni tin hian a lo lang a. An rilrua hnathawktu Pathian a va’n ropui em! Ka tlin lohzia leh ka lo nepzia ni tin hian a tharin a lang a. Harsatna leh chhiatnate mahni chunga thleng ve lo tura ngai ang hrima midangte ngaihsak miah lova khawsak a that lohzia hmuchiang thawkhatin ka inhria. YEARLY PLAN-a kan dah tel hauh loh harsatna chu kan chungah a lo thleng ve ta reng mai. Chutih laiin keini aia nasa maha chhiatna leh manganna tawk an awm ve tho tih ka hmuhin midangte khawngaih theia kan la awm avangin Pathian hnenah lawmthu sawi tur kan ni.

Kan Plan-a tel lo hi kan chungah a lo thleng fo si a, ni tin hian inbuatsaih kan mamawh a lo ni. ICU-a kan awm chhung la rei lo teah pawh hian mi engemawzat chu a khamphei zawngin anmahni in lam panin Hospital atangin an hawng a: Tam takte phei chu thalai, la naupang takte an ni nghe nghe. Chhiartu duhtak,chanchinbua Article-te chhiar nachang i hriat avangin mi pangngai chung lam i ni tih hria la, midang hmuh lohvin nui khi ver ver phawt mai teh. Chumi hnuah chuan i YEARLY PLAN-a tel hauh lo i chungah a lo la thleng ve dawn tih hria la, i theih ang tawka thain inbuatsaih ang che.

NAUPANG TAWNGTAINA- Ziaktu hriat loh

Pathian duh tak, I la harh em aw? Minute hnih khat lek i hman lawk em? Mi hriatthiamna i ngah em kha. I hnenah sawi tur pawimawh tak ka nei a ni. Zan danga a tih thin angin, hei ka nuin ka rizaite min rawn sintir a. Muhil awm takin ka lo maimitchhing a, a thim tawh chuan min rawn hmu thei lo va. Mahse, a tap ri ka hriat chuan, ka en ngam leh si lo. Ka khum buIa dinga i hnenah thu a rawn sawite chu i hria em? Engvangin nge ka nu hi a lungngaih em em?
Ka thil tihsualte ka ngaihtuah a, a mal te tea a han sawi chuan ka thiltihte chu ka hria e... huana kan kal lai khan khan pangpar eng ka lawh atang khan tomato a lo chhuak dawn tih ka hre lo tak tak a. Charlie nena hnim kan pawh a, Carrot kan pawh tel khan ka nu a hlim lo ang tih chu ka ring, ka nu khan chawlh a rawt ta nghal a nih kha.
Ka nu khan chawlh hahdam a mamawh thu a sawi a, a lu a nat thu te a sawi a, ka nau nena bengcheng lova infiam turin min hrilh a. Pathian, ka nau chu sam kir i pek kha i la hria ang a. Sam siamna dawr lem kan siam a, kan inkhualtelem ta a, kan bengchheng miah lo, a sam pawh a dang ta. Mahse, ka nu a lungawi lo. Khum pindanah min awmtir a, vawi khat mah mi sam tan sak tawh lo turin min ti ta a.
Tlaiah pawnah min awmtir a, ka nu lu na leh hah lutuk rilru tihhlim tumin pangpar kha kan thliak a, ka pa lo hawn khan kan pangpar eng lak khawm kha ka nu kan pe a. Pathian, kha pangparah khan Tomato a lo chhuak dawn tih kan hriat loh vang a ni ka tih tawh kha.
Kan balh deuh avangin keimahniin inbual turin min tir a, sahbon pawh keimahnia hman min phalsak a, Charlie chuan tui a ngaina ve lo va, kei chuan sahbon chu ka tiphuan thiam a. Kan insil zawh chuan inhnuaiah kan chhuk a mahse chaw kan ei laiin inchhungah ruah a rawn sur ta. Tap kan off theihnghilh vang a ni.
I hnena a rawn sawi zawng zawngte kha ka lo ngaithla ve a. Ka harh a, a thusawi ka hriat vek thu leh ngaihdam dil ka tum lai takin, “Lalpa vawiina harsatna ka tawhte avanga ka thinrimna zawng zawngah min ngaidam la, zaidamna min pe la, naktukah an tan nu tha zawk ni turin min pui ang che..Isua hmingin ka dil a che. Amen” a ti ta mai a. A rawn kun hniam a, ka sam te chu min chul sakin, “Ka duhtak te, ka hmangaih che asin,” a rawn ti lehngal a; ka harh tih hre miah lovin ka room chu a chhuahsan ta a.
Pathian, vawiina ka nu rilru ka tihah kha pawi ka ti em em a. Ka duh vang reng a ni bik lo tih i hriat kha. Mangtha, Pathian, ka thusawite min ngaihthlaksak avangin ka lawm e. Naktukah chuan ka fel tawh viau ang.. mahse, ka nu chu dawhtheihna chu pe tho ang che, a mamawh leh tak hlauhin. Amen

LAWRKHAWM

Women’s Minisries Fehchhuah:March ni 13 (Sunday) hian Women’s Ministries chuan sum tuak fehchhuah an nei dawn a, Member-ten thahnem ngai takin i dawr theuh ang u.

AYF Exe Meeting: Nizan (7 Mar) AYF Executive Committee meeting chuan Kan Society tan Rs. 6000 inkhawmpui budget atan min tuk a. Hetiang hian Goal insiam a ni: 7th day tlang - Rs 6000, Maubawk- Rs 5000, Dinthar - Rs 4000, Zotlang - Rs 3000, Chawlhhmun - Rs 3000, Sairang - Rs 1000, Lengpui - Rs 300, Serzawl - Rs 200.
Tin, Social Activities Chairperson, Tv H Laltlanmawia'n hmun danga hna a thawh dawn avangin a pha a, a aiah Tv R Lalhmingmawia ruat a ni.

Danial Pawl Inkhawmpui: Tun Sabbath (March 12, 2011) hian Saitual Bial Danial Pawl Chhantu inkhawmpui Khawlianah neih a ni dawn a, Conference atangin Pu Lalnilawma Colney, Union atangin Pastor Zohruaia Renthlei, Zoram Danial Pawl Chhantu atangin Pu Zakhuma Ralte leh Pu Ramengmawia Colney te an kal.
Saiha Bial Danial Pawl Chhantu inkhawmpui Tuisihah neih a ni dawn bawk a, Pastor R Biakthansanga, Pu VL Mawia leh Pu Liankhuma te hmanpui turin an kal.

Serchhip Bial Women’s Ministries inkhawmpui: Hualtu khuaa inkhawmpui neih turah Pi Nunthari Sailo leh Pastor H Zairemthanga te vawiin khan an kal.

Admission Hawn mek a ni: Helen Lowry School-ah Class XII tan Admission tunkar thawhlehni atang khan hawn tan a ni. Helen Lowry School-ah hian kumin atang hian Class XI Commerce zirna hawn a ni dawn.

Basic Music Training School: Mizo Conference chuan Youth Department hnuaiah Solfa zirna a buatsaih dawn a. Ngaihven duh tan Pastor PL Thlenga, Youth Director biak mai tur a ni ang.

Thupuan Seminar: Tunkar thawhleh zan atanga ningani zan thleng khan Mizo Conference hnuaia Pastor leh Evangelist-te leh Lay member thenkhatten Thupuan zir hona 7th day tlang Kohhran biak inah an nei. Union atangin Pastor R Zohruaia a lo kal a ni.