Naktuk Divine Servic-ah Communion Service neih a ni dawn a, Pastor H Zairemthanga’n hun a chang ang. He hun pawimawh tak hi mi tinin ngai pawimawhin kan vaiin tel theuh tum ila, tawngtaina nen lo inbuatsaih theuh ang u.
Deacon Duty tura ruatte : Pu C Zomuana, Pu Lalrinsanga, Pu Chawngsiampuia, Pu Nirmal Swansi, Pu CL Zohmingthanga, Pu F Lalhriatpuia
Tui buaipui turte: Pu Joseph Lalmuanpuia, Pu PC Lalthlamuana, Pu Zothanzuala
Karleh tawngtai inkhawm banah Business Meeting neih tur a ni a, Department tin atangin First Quarter chhunga rawngbawlna leh hmalakna report ngaihthlak a ni ang. Department hrang hrang Secretary leh hruaitute lo inbuatsaih tura beisei an ni. Business Meeting-ah hian kal thei chin leh kal thei lo an awm chuang lo va, Baptisma member chu tupawh kal theih a nih avangin, kohhran rorelna khawl sang ber a ni.
Business Meeting-ah Member kal kan tlem thei hle a, Church Board Meeting zat deuh chauh kan kal thin a, Member tin hian a pawimawhzia hria a, kal tum i tum theuh ang u.
Aizawl West Danial Pawl Chhantu hnuaia thawk turin tirhkoh hna a ruak a, Pathian rawngbawlnaa tuimi leh \hahnemngai tan dil theih a ni. Diltu chuan Kohhran recommend-na lehkha thil telin, June 7, 2011 (Tuesday) thleng Aizawl West Danial Pawl Chhantu Chairman leh Secretary hnenah dilna thehluh theih a ni.
Interview hun leh hmun chu a hnuaia mi ang hi a ni e.
Interview hun : June 12, 2011 ( Sunday) 11:00 a.m.
A hmun : Committee Room, Mizo Conference,
Seventh-day Tlang, Aizawl.
sd/-
C Lalnunmawia
Secretary
Aizawl West Danial Pawl Chhantu
Revival And Reformation
Kohhranin Harhtharna leh siamthatna Programme a kalpui mek a. Hetih lai hian lo thleng tura kan beisei leh kan tum hi a inang lo thei hle awm e. Thenkhatin hmanlaia harhna kan tih ang- khawlaite fang a, zan rei tak tak thleng a hlim taka zaia phur taka tawngtai ang kha an beisei a. Thingtlangah te kala Pathian thu, a rem loh rem lo, a hun leh hun lo pawh sawi lo va, tlangaupui tawn tawn hunte kha kan ngai a.
‘Fangrual’ an tia, khaw hran hrang member-te intlawh kualin hlim takin hun an hman laite ngaihtuah chuan khang hunte kha a ngaihawm hle mai. Mahse, khatiang kha kan beisei leh kan lo tum rilruk a nih chuan tunlai ang kum 2011 hunah meuh tawh chuan a thleng kher awm lo ve. Thlawhlai kalsana, hlo har tak tak hmaa hna thawh chhunzawm leh mai theih ang kha a ni lo va, tunlaia kohhran member-te hi chu ni 2/1 an hna han kalsan se, hotute Room-a insawifiah a ngai ang a. An chhunzawm lui a nih ngat chuan hna nei lovin an awm mai ang.
Kan khawvel hun zira harhtharna leh siamthatna hi kan kalpui a, kan beisei pawh hi her rem thiam a pawimawh hle mai. GC lama kan hotute pawh hian hmanlaia EG White-i te hun laia harhna leh an rin dan ang chiaha let leh tur khan member-te hi min beisei lo. Khang hun laia an lo rin dang ang Doctrines tihdanglam a awm ta nual a, Pathian thu hi vawi khata hriat vek theih leh hriat fiah nghal vek sen a ni lo va, James White te hun laia kohhran thurin leh tunlaia kan thurinte pawh hi a inang lo nual tawh niin a hriate’n an sawi. Hei hian hun kal zel mil hian kohhran pawh hian a rawngbawl dante a siam rem ve zel a ni tih a tilang a. Keini pawh hian kan tunlai member-te hun neih dan te, an rilru te hrethiam tak chunga revival & Reformation hi kan kalpui a ngai a ni.
Pr. L. Hmingliana Hriatrengna Inkhawm
Date 15-03-2010
Place – Mizoram 7th day Adventist Conference Hall, Nisarih tlang
Eulogies – (A thawhpui leh thian ten a chungchang an sawi dan)
~Dr Rinpuii
Pr R Zohruaia chuan Hun tam tak Pr L Hminga’n inenkawl nan a hman thu leh Shillong-a an inhrawn dan te ngaihnawm takin a sawi a. A thih laia Shillong-a awm lo pawi a tih thu a sawi. A fapa Benjamin Lalduhsaka’n nupui a neih hma a thla thum teh meuh Bible Study-a a hrual thu a sawi, (A nupui tur erawh chu Pr Saizika’n bible study a pe thung).
Pr R.Biakthansanga’n Hun serh a hmangin fuihna thu a sawi.
Pr. HB. Lalkhawliana – “Mithuk, mi ropui a ni.”
Pr. C. Aitawna – “Administrator tha a ni, a hnuaia thawkte min hau ngai lo, a lungawi lohna chu a hmelah min hmuh duh chauh a ti. A thawhpuite hnenah News hi chu a headlines tal chhiar rawh u a ti thin. Sapte pawn a saptawng thiamzia an sawi.”
Pi Sangkungi – “Elementary School a kal laiin Pr. L. Hminga’n a zirtir hman. A thusawi thenkhat a la hriatte, ‘ka nakruh thenkhat an paih tawh a, ka tawng ring thei lo,’ a ti. Thil pakhat an zir a theihnghilh tawh miah loh tur a zirtir chu, “Sweetly sing the donkey at the break of day, if you do not feed him listen to what he say, he haw, he haw……(3);” Vawiin thlengin a la theihnghilh bik lo. Pi Rualngailovi puih hlekna nen.
S. Lalkamlova – “In sak a thiam lo,” Public Relation thiam lo a ni keimah ang thovin. Hotu Administrator a ni a – a mawhphurhnaah a tlanchhe ngai lo. Division Council ah te – Bible study pe turin dahban a ni ngai lo, policy a hria. A duhsak leh ngaihsante chu Pr. Sanglura leh Pr. Lalthankamlova. Thil sawi hluak hluak chi a ni lo. A thusawi a tunlai reng (a chhiar zau); a tawngkam a tunlai (a sermon te a ngaihnawm); mi rinawm leh mi dik a ni. A hriatna leh thiamnate chapopui tham mahse a chapo pui lo. A thuziak leh lehlin te hi a chhiar a nuamin tawngkam a mam nalh, Mizotawng a man tha. Sawrkarah te emaw lo lut nise Advisor ni tlak khawp a ni, mi principle nei mi a ni. Pathian mi tak, mi chapo lo a ni.
Pr. C. Hmingliana – “New Orleans a GC an zuk kal ho khan, Booth hrang hrang a awm a, a saptawng thiamzia khaa lo show ve zauh aniang saphote chuan an ngaisang riau mai a ti, pa titi thiam leh thusawi ngaihnawm mi tak a ni; thil sawidan a thiam. A thil sawi zinga pakhat Three(3) P’s – Piang, puang leh phun (pung). Pr. L. Hminga chuan a rochun te kan hria, keimahni theuh hi engnge a hnutchhiah? Engnge kohhran tan kan hnutchhiah ve ang? tih chona a sawi tel. Nun fimkhur leh nun uluk, mi tana hnawksak silo a nihzia leh chhung leh chi leh kuangte a duhsak bik ngai chuang lo.”
R.K. Sangliana – “District Council an tan tirhin a tlangpuiin sawrkar hlawh kha Rs.60 atanga Rs. 80 per month a ni a. BBA anih avang khan sum lam khawih turin sawrkarin a sawm a, Rs. 300 hlawh turin- chu chu a hnial fithla thak a ni. Engtikahge a lo zir kan hre lo mahse staff note te a chhiar thiam a ti. Khasi a thiam em thu kan hre lo, mahse saptawnga sawi kha Khasiin a let thin!
R.L. Sangvunga – “A thil hriat mite hnenah hrilh chhawn a thiam em em a, mi duham lo tak a ni. A huntawpa February thla a Pu Raltea nen Pu Hminga an zu tlawh khan, anmahni kha a lehkhabu ziah a lo present duh a, chu chu a muthmun atangin khawilai shelf ah nge tih leh a dahna chiah a sawi thei a ti. (Mi in chengvawng tak chu a ni.)
Office-ah hun a vawng dik em em a, hma takah worship turin a lo thu a, a zahawm em em mai a ti. A zu tawngtaisaktuten an tawngtaisak hnuin tawngtaina a lo hmang ve thin. Mizo Conference leh a chhehvela school a ni emaw, Evangelism chungchang a ni emaw Hospital hmasawnna te hian min ti harh tulh tulh thin a ti.
Dr. Kenneth Chawngliana - Mi danglam tak a ni. Presbyterian kohhran kan rilru a lo lutte chu Liangkhaia tih leh Rev. Zairema tih te a ni a. Baptist tih chuan Sawiluaia leh kohhran danga chuan Sapliana tih te Kawlkunga tih te an ni. SDA tih chuan HB Lalkhawliana tih te Lalhmingliana tih te a ni ve thung. Integrity nei, principle nei, hriatna sharp, Bula awm nuam mai.
Mite chuan Wedding Anniversary hrang hrang- Diamond te, Golden te, Silver Jubilee te an hmang a, kei hian eng Jubilee nge ka lawm ve theih ang a tih chuan, ‘Paper Jubilee’
i.e: 10 years anniversary hmang turin a lo hrilh. Saptawng chu a thiam a ni.
Lalnilawm – Amah kantu te suit nen nalh zaihin sitting room-ah alo kawm thin. Mi inuluk a ni.
Cowboy a ngaisang ve a, USA-ah pawh Texas-ah cowboy nunchang zir turin a zin vang vang a ni. Israel rama zin report a pe ngaihnawm. Sawrkar mite lo ni se, kan top citizen tur a ni.
Pu Ralte nupui chuan ti hian a sawi, “Mi mak tak a ni. A nu leh pate pawhin an zah.”
Kan Adult franchise kan exercise tur a ni ,Vote thlak tur a ni a tihna 1998 a Vellore a a sawi kha ka la theih nghilh lo, ka lo ngaihdanin a lehkha bu lehlin zinga pakhat Chatuan Nghahfak hi university-ah Mizo literature ang ah te an la zir thei ang ka ti.
KHAWVEL PUM HUAP RAWNGBAWLNA
He ram chanchin tha hi hnam zawng zawng hriattirna turin khawvel zawng zawngah hrilhin a awm ang; Chu mi zawhah chuan tawpna chu a lo thleng ang.” (Matthaia 24:14)
Khawvela chanchin tha puan zawhna tura hmanraw pawimawh berte zinga pakhat chu Bible Ralchhan School (Bible Correspondence) hi a ni ngei ang. He Bible Ralchhan School hmang hian mi tam takin Krista an hmuh chian phah a. Krista’n keimahni kutah midangte Chhandamna thuchah chu a dah a ni.
Kan zavaia Vantirhkoh pathum thuchah kan puan theihna kawng chu V.O.P zirlai midangte hnena sem a, zirtir turin hma kan la thei a ni.
Bible Ralchhan School hi kum 1942-a din tan a ni a. Nikum 2010-a Report hnuhnung berah chuan khawvela ram 140 velah din a ni tawh a, chung rama tawng chi hrang hrangin zirlaite buaisaih a ni bawk.
Russia ram khawpuia Pastor Mark Finley-a ten Crusade an neih pawh khan memberten a hmain mi 100,000 vel chu V.O.P Graduate an lo nei tawh a, khami tuma baptisma chang tam berte kha V.O.P lo zir a, Pathian thlarauvin a lo luah tawhte an ni.
Isua lo kal thuai theih nan kan zavai mai hian kan hmanraw neih sa V.O.P zirlai hmangin thlarau bo mangangte hi zawng chhuakin Krista hnenah hruai kan tum ve thei dawn lawm ni?
Kumin chhung hian member tin ten V.O.P zirlai pahnih khat tal zirtirin Lalpa rawng i bawl ang u.
Pathfinder Meeting: Sunday chawhma dar 10:00-ah biak in kawtah kim taka kal khawm tur a ni e.
AYF Membership Fee khawn dawn: AYF Membership fee khawn a ni dawn a, member pakhat tan Rs 10/- zel a ni ang. Hming, pa hming leh Address te kim taka ziahlan tur a ni ang.
Remnant Revival Team: Remnant Revival Team buatsaihin Lungleng thalaite’n naktuk Sabbath ni hian Khumtung thalaite an tlawh dawn. Tunhnai khan Khumtung-ah leh Lunglengah te hian Revival Meeting leh Camping te buatsaihin kohhrante an hlim hle. Remnant Revival Team-te hian karleh lamah Saiha-ah Revival Meeting neihpui an tum bawk a. Team member-ten kohhranhote tawngtainaah hre reng turin min ngen a ni.
Revival And Reformation Sub Committee Meeting nei: Tunkar tawngtai inkhawm ban khan Fellowship Hall-ah Revival And Reformation Sub Committee Meeting, Upa S Lalkamlova hovin neih a ni a, Kan Kohhrana Revival And Reformation Programme kalpui dan turte rel ho a ni a. Kohhran hruaitute (Kohhrana chanvo chelhtu) tan Retreat buatsaih thuai tum a ni.
Conference hotute zin: Pu Daniala Sailo leh Pastor Malsawma Tochhawng te Thenzawlah an kal a, Pastor VL Sanglura te Saiha-ah an kal.
Dr Rinpuii Champhaiah: Tunkar khan Dr Rinpuii chu Champhaiah a kal a, Champhaia Adventist Hospital-ah March 31 khan Steam bath khawl thar an hawng a, Damlo mi 100 chuang a en bawk.
Zaipawl sum tuak: Tunkar Sunday khan Dinner buatsaihin Rs. 10,000 chuang an hmu a. An zanriah buatsaih a tuihnaiin an Programme pawhin a felfai a. Zaipawl Member te inbuatsaihna a fakawm hle. Zaipawl hian Champhai lam tlawh tum an inbuatsaih mek nia thu dawn a ni.