Lunglei atangin a tute inneih hmanga Keifangah kal turin Diktea Pu, Elder C. Thangliana chu Feb.14, 2011(Monday) khan Aizawl a rawn thleng a. Pa taima tak mai a ni a, hnathawh tur ruahman engemawzat a neih thu min hrilh a. Pa(Mushroom) khawi a tum avangin Horticulture Department-in Chite Lui kama Pa khawina hmunpui an siam chu Feb.15, 2011(Tuesday) zing khan kan pahnihin kan va tlawh a: Pa khawina tur Polythene tha chi chu Rs. 2,000/- man lai a lei nghal a: Keifang a kal zawh a tan nghal mai a rilruk a ni. Feb.15, 2011 chawhnu lamah Keifang lam panin Sumo-in a chhuak ta a; Tluang takin inneih an hmang dawn emaw kan tih laiin Feb.16(Wed) a lo inherchhuah meuh chuan thu thinthawng tak kan dawng ta tlat mai! A tuk zingah chuan, inneihna inkhawma tel turin a zan mu chu kaihthawh theih a ni ta lo! Hlim taka Keifang lam pana kal chhuak Diktea pu kha engmah hre lovin a rawn let a, rilru a na duh hle mai.
Aizawl Civil Hospital Casualty Ward-a zan khat kan riah hnuin ICU-ah sawn luh kan ni ta a. ICU-ah hian kan chhung zinga mi an awm ve ang tih kan lo hisap ngai reng reng lo a! Awmdan thiam a har a, rilru a buai duh hle mai. Natna te, chhiatna te, thihna te leh tawrhna te hi midang chung chauha thleng tur emaw tih a awl hle mai. Aizawl Civil Hospital han riahchilh meuh chuan mit a var uarh uarh mai.
Then leh rual leh chhungkhat lainate leh kohhran mite thatzia ni tin hian a lo lang a. An rilrua hnathawktu Pathian a va’n ropui em! Ka tlin lohzia leh ka lo nepzia ni tin hian a tharin a lang a. Harsatna leh chhiatnate mahni chunga thleng ve lo tura ngai ang hrima midangte ngaihsak miah lova khawsak a that lohzia hmuchiang thawkhatin ka inhria. YEARLY PLAN-a kan dah tel hauh loh harsatna chu kan chungah a lo thleng ve ta reng mai. Chutih laiin keini aia nasa maha chhiatna leh manganna tawk an awm ve tho tih ka hmuhin midangte khawngaih theia kan la awm avangin Pathian hnenah lawmthu sawi tur kan ni.
Kan Plan-a tel lo hi kan chungah a lo thleng fo si a, ni tin hian inbuatsaih kan mamawh a lo ni. ICU-a kan awm chhung la rei lo teah pawh hian mi engemawzat chu a khamphei zawngin anmahni in lam panin Hospital atangin an hawng a: Tam takte phei chu thalai, la naupang takte an ni nghe nghe. Chhiartu duhtak,chanchinbua Article-te chhiar nachang i hriat avangin mi pangngai chung lam i ni tih hria la, midang hmuh lohvin nui khi ver ver phawt mai teh. Chumi hnuah chuan i YEARLY PLAN-a tel hauh lo i chungah a lo la thleng ve dawn tih hria la, i theih ang tawka thain inbuatsaih ang che.
