ADVENTIST YOUTH SOCIETY (Nilai zan khan OB Meeting neih a ni.)

Tunkar nilai zan (April 27) khan OB Meeting neih a ni a, naktuk zan (Sabbath zan)-ah AYF Membership Fee khawn tum a ni. Naktuk inkhawmah thil Member-te dah khah tur lehkha sem tum a ni a, chumi lam khawm pah chuan Membership Fee, mi pakhat tan Rs 10/- khawn a ni ang.

AY Sports Naktip (Sunday) zanah Helen Lowry School kawtah Sports neih tum a ni a, he infiamnaah hian member zawng zawng kal tura beisei kan ni. Infiamna Football, throw ball, etc a tel theite chuan AYF Membership fee khawntute hnenah inhriattir nghal zel tur a ni. AY Hruaitute’n Team lo siam lawk an duh avangin tel turte hming hriat lawk a ngai a, hming lo pe lawk turin min beisei a ni.

HSSLC (CLASS XII) RESULT

Kar hmasa ningani (April 21) khan MBSE HSSCL result a chhuak a, hengte hi kan member pass kan hriat theihte an ni:

Lalruatdika s/o Lalthanzara Colney

Vanlalthasangkima s/o Lalngaihawma

Laltlanzovi d/o Lalngaihawma

Linda Lalawmpuii d/o Lalluaia

Vanlalduhsaki d/o Vaninmawii

PC Laldinpuia s/o PC Zorinmawia

K Malsawmzuali d/o Lalzuithangi

Lalrinnungi d/o P Biaksanga

Joycelynn Ralte d/o Vanlalruata Ralte

Gladys Hmingsangzuali d/o Thangtluangi

Ziah hmaih kan lo nei a, chungte hria kan awm a nih chuan Editor-te hriattir turin kan inngen e.

HUALTU-AH HARHNA

Remnant Revival Team-te’n April 21 - 27, 2011 chhungin Hualtu-ah rawngbawlna an nei a, Kohhranah harhna duhawm tak a thleng. Chawlhkar khat dawn camping neih a ni a, mi 130 vel an lutin Pathian Thlarau hnathawh duhawm tak avangin an hlim hle. Kohhran hruaitute leh thalaite’n Pathian hnena inhlan tharna neiin, Krista hmel hliahtu nia an hriat an thil neih te paihbovin chaw nghei tawngtaina nen Camping zawh hnuah pawh hun an hmang chho zel a, Kohhran hruaitute chuan, “Hetiang harhna leh hlimna hi kan kohhranin kan la tawng ngai lo,” an ti hial a ni. Hualtu Kohhran hi lawmthu sawi puiin i tawngtaipui zel ang u.

Remnant Revival Team Speaker Pu Lalthlamuana (Patea) chu vawiin khan Cherhluna Hnahthial AY Group Intawhkhawmnaa Speaker ni turin Lunglei lamah a kal. Pu Patea hian Kohhran mite tawngtaipui turin Ay Kantu kaltlangin min sawm a, a rawngbawlna leh a tan i dilpui thin ang u.

EDITORIAL

Piangthar an ti che em?

Rawngbawltute, Kohhran Lay member te, kan vai hian miin piangthar niin min hria em tih hi zawhna pawimawh tak a ni awm e. Biak ina thu sawi leh mi hmaa din nikhuain Pathian nena inpawlna leh Testimony sawi fo thin mah ila, kan thusawi ngaithlatuten piangthar nun nia an lo hriat ang kha kan nuna an hmuh tlat si loh chuan kan thusawi chuan awmzia a nei tam lo hle ang.

Tirhkoh Paula’n Korinth mite hnena, “Ei tur hian ka unau a tihtluk chuan, ka unau ka tihtluk lohna turin kumkhuain sa reng reng ka ei tawh lo vang,” a ti a. Pawi lem lo nia kan hriat pawh hi kan unaute’n an tluk phah nana an hmang dawn a nih chuan tih loh mai tur a lo ni a. Ringtu tih awm loh tak kan ti a, ringtu awm dan awm loh taka kan nung fo a, ringtu sawi awm loh tak kan sawi fo mai chuan, mi’n tluk phah nan lo hmang lo mah se, kan rawngbawlnain rah tha a chhuah thei ngai lo vang.

Ringtu chuan kawng dik leh dik lo te, inchei dan phung te leh kawng hrang hrangah te dinhmun nghet (Principle) fel tak neih tur a ni a. Chungah chuan ‘a dik apiang te, a fel apiang te, a thangmawi apiangte’ zawn tur a ni. Chutih rualin kan ngaihdan hi a tha ber ziah kher lo tih hriat a tha. Incheina atana mawi leh zahawm ka tih hi ka thenawm tan mawi leh zahawm a ni lo thei a. Ka duh dan leh ka rilrem zawnga mi a inchei loh vang mai a, rel emaw sawisel emaw ka ching mai a nih chuan mite tan tlukna leh hnawksak mai ka ni thei.

Mahni nun theuh ngaihtuah ila, midang khawsak phungah inrawlh lutuk tum lo ila; an thlarau tanghma ngaia Krista hmel hmuhtir kan tum vanga thil ti leh sawi kan nih loh chuan inrawlh lo mai ila, kan unaute hmangaihin an tana tha tur ngaihtuah zel ila, hlim takin i dam chhung tawite hi i hmang teh ang u.

MIZO SUMMER MINISTRYSpicer Memorial College~Zothanzauva Pachuau

Spicer Memorial College atanga Pathian thu zirlai duhawm tak tak, mi 25 zetin Mizoramah rawngbawl turin an lo chhuak a; hmuh an nuamin min tiphur hle mai. Zoram dung leh vanga Adventist Kohhran eng emaw zat tlawh turin an inbuatsaih a, an bul tanna atana Seventh-day Tlang Kohhrana hun an hmang thei kha thinlung takin an lawm hle niin ka hria.

Kohhran membert-te’n eng ang takin nge kan lo dawn sawn chu ka hre hauh lo; mahse kei, ka mimal lo thlir dan chuan, kha ti ang hun hlimawm leh hlawk thlak tak mai min rawn hlui thei kha ka lawm tak zet a ni. An thuchah nung leh awmze nei tak khan ka thlarau nun hi a chawi kang a, ka kristian nun kawnga ka mamawh, ei tur tha min rawn pe ni-ah ka ngai.

Sabbath zana Tv Lalbiakliana thusawi, midangte tana nun hman leh ngaihsak chung chang te kha a ngaihnawm mai ni lovin awmzia a va nei ril em! Kha ti ang Pathian thusawi nung tak, han ngaihthlak kha kei chuan nuam ka tiin Isua lamah chuan min hruai hnai ngei niin ka hria. Ka tlin lohna leh thiam lohna min hai lan sakin min kawh hmuh a; mahse, ka mamawh Isua chu min hmuhtir kha ka va han lawm em!

A tuk, Divine Service inkhawmah Pu Vanlaltluanga’n Kristian tha tak nih theihna kawng point nga a sawi ve leh a. Thawhlawm kan khawn avangin ka ngaithla kim vek hman lova, ka ui tak zet a ni. A thusawi tlem a zawng, ka hriat chhun pawh khan min hneh hle mai. Tun hmain Pu Vanlaltluanga te nen kan lo awm ho tawh thin a, thusawi a thiam tih kan hre hran lo. A dik tak chuan, kha ti ang taka thu tha kha a rawn sawi theih kei chuan ka lo beisei lo. Mahse, Ama insawi ang takin a inbuatsaih nasa a, Pathian Thlarau Thianghlimin a hmang a ni tih loh rual a ni lo. A thusawi zinga ka thinlunga la cham reng chu, “Insen Ralna” tih kha a ni. Atul hunah Pathian tana inseng ral ve tur hian ka thei ang em? eng tik nge a hun chu ni ang? Tirhkoh Paula leh Isua Krista te insen ralna phei kha chu a va han ropui leh zual a em!

He mite pahnih thusawi ka ngaihthlak hian ka nun a khawih danglam hle a, Krista-a ka thanlenna kawngah hian zirlai zir tur ropui tak tak min chhawp chhuah sak a ni. Pi White-in “Jesus Christ will be the center in every sermon” a ti ang khan, kan sermon tinrengah hian Isua Krista hi a laimu berah hman a nih zel chuan kan thlarau nun chu nasa taka chawmlenin a awm ngei ang. Kan Kristian nun kawngah hian than lenna tur hi a va tam em! Hun rei tak chhung chu Thurin 27 kan nei a; mahse tunah chuan “Growing in Christ” (Krista-a than lenna) tih hi belh a ni ta a, tunah chuan Thurin 28 kan nei ta. Thurin tam tak kan hriat hnu pawha kan mamawh tak mai chu Krista-a thanlen zel hi a ni; chuvangin Krista-a thanlenna thu Thurin atana an belh pawh hi tih awm reng a ni. Thusawitu tin te’n mipuite thlarau nun chawmtu tur thu, sawi chhuak thei turin tawngtaina nen i inbuatsaih sauh sauh thin ang u