30 Sept

COMMUNION SERVICE LEH DAY OF FASTING AND PRAYER

Naktuk Divine Service-ah Communion Service neih tur a ni a, Upa S Lalkamlova hun changtu a ni ang. He hun hi ngaipawimawh theuh tura ngen leh beisei kan ni.

Deacon Duty turte:

Chhang leh Uain sem tur: 1) Pu F Lalhriatpuia 2) Pu PC Lalthlamuana 3) Pu Chawngsiampuia

4) Pu C Zomuana 5) Pu Zothanzuala 6) Pu Joseph Lalmuanpuia

Tui buaipui turte: 1) Pu Daniel Tete 2) Pu Vanlalhluna 3) Pu R Lalhmachhuana

Duty turte chu Kamis var leh Kekawr dum haa Necktie awrh vek turin beisei an ni.

Poor & Relief Fund: Kan tih thin angin naktuk Communion Service neih zawhah Poor & Relief Fund khawn tur a ni ang.

Day of fasting and prayer: Naktukah vek hian Chaw nghei Tawngtaina hun nilengin hman leh tur a ni a. Member-te a tam thei ang ber tel i tum ang u. (Programme kimchang kan rawn tarlang thei lo va, a pawi kan ti hle)

THALAI HNATLANG NEIH TUR

Sunday (2 Oct, 2011)hian AY Hnatlang neih tur a ni a. Hmanraw ken turte: (Hmeichhia: buara or Leivung thiarna tur) (Mipa: Bawngtuthlawh, chempui, Suahdur, Thirtiang/tuthulh, dozer) Hnatlang turte chu Zing dar 9:00. A Hmun: KC Thanga Complex (Upa F Zatluanga kawmthlang)

SAITUAL BIAL DANIAL PAWL CHHANTU SILVER JUBILEE

Saitual Bial Danial Pawl Chhantu Silver Jubilee lawm turin Conference President Pastor R Biakthansanga, Pastor PL Biakchhawna te bakah Saitual lam khawchhuak leh member engemawzat Saitualah an kal.

NAUPANGIN PATHIAN THU ZIR

Sept 25 (Sunday) ni khan 7th Day Tlang Kohhran naupangte chuan nilengin Pu Zosiamliana hovin Pathian thu zir hona leh inhlan thar lehna an nei a. Naupangte an kal tain an hlawkpui hlawm hle.

October ni 6 (Thursday) leh October ni 9 (Sunday)-ah Pu Zosiamliana ho bawkin chhunzawm leh turin ruahmanna siam a ni a. Tiffin pai lehtheuh tur a ni ang.

Editorial

Kohhran chhung rawngbawlna

Rawngbawlna hi Kohhran din chhan pawimawh berte zinga pakhat a ni awm e. Rawngbawlna kan tih hian Kohhran pawn lama rawngbawlna chauh hi kan ngaihtuah a nih chuan a dik lo vang a. Kohhran chhunga rawngbawlna nen rualkhai takin a kal dun tur a ni ang. Kohhran member-te’n naute an nei a, kohhran hminga naute in ensak kan ching te hi thil tha tak a ni. Tunkar chho pawh khan Kohhran nuho chuan kohhran hmingin naute eng emawzat an ensak a, thilpek te an hlan a. Naute neite tan chuan a lawmawm em em dawn a ni.

Kohhran mite chu kan lawm a inlawmpui tawn a, kan lungngaiha inhnem tur kan ni a. Unau chhungkhat kan ni tih hriaa, kan harsatnate intawngtaipui tawn a, harsatna atanga intanpui tawn hi kan tih tur a ni reng a ni.

Khawlaia inhmuh te hian hun a awm a nih chuan hlim hmel pu chungin inbe thei zel ila, hun a awm lo a nih pawhin hlim hmel inhmuh a inkal pelh pawh thil tha tak a ni ang. Hei hi Kohhran hruaitute tih turah chauh dah lovin kan vaiin i ching ang u.

Member-puite sawichhiat hmang leh mi rel ching an awm a nih chuan anmahni chu dem mai lo vin; i tawngtaipui thin ang u. Thenkhat hi chu an sual vang pawh ni lovin, lo chin dawklak (Habit) vang chauhin mi an rel an rel ve mai bawk thin a nia.

Lawmte inlawmpui a, zirnaa hlawhtling te, hna thar hmute lawmpuite hi a dawngtu tan chuan a lawmawm thei em em a ni tih hriain lawmpuina thute hi ren miah lovin sawi thin ila, mite fakna hi an thih hun nghak lovin an hriat turin, an dam lai ngei hian i sawi thin ang u.

Article

“MI HRIAT RENG NAN HEI HI TI THIN RAWH U”

~Laltanpuia Khiangte

Mi thenkhat chuan Luka 22:19-a Isua tawngkam pawimawh tak, “Mi hriat reng nan hei hi thin rawh u,” tih hi lehlin dik lo niin an ngai a. Saptawng Bible-ah pawh ‘ti thin’tur angin a lang lo va, hriatrengna chawhlui an kil ho ni maiin an ngai a ni. Fundamental Baptist-ho buatsaih Thuthlung Tharah pawh “Hei hi ka taksa, in tana pek chu a ni. Mi hriat reng nan hei hi lo ti rawh u” a ti then mai.

Heti ang ngaihdan neitute thusawi hi chhut chian lem loh chuan dik thluamin a lang a. An sawi ang hian Saptawng Bible lehlin (version) hrang hrang han en hian ‘ti thin’ tia lehlin ai chuan, ‘ti rawh u’ tia lehlin a inhmeh zawk reng a ni. Saptawng Bible hrang hrang, KJV te, TEV te, RSV te, leh NRSV te chuan “Do this in remembrance of me,” tih vekin an dah a. The Living Bible chuan tlema her danglam hretin, “Eat it in remembrance of me,” a thung a. Mahse hei pawh hi “do this” tih nen a thuhmun tho va, a danglamna a awm hran lo. NIV te, Philips Modern English te, leh Jerusalem Bible te chuan “Do this as a memorial of me,” tiin an dah a. NEB erawh chuan he lai thu tak hi a ziak lang ve lo va, a phek hnuai lamah note siamin, “Some witnesses add the following: ‘which is given for you; do this as a memorial of me,’ tih a tarlang a. Saptawng Bible dang pawh rawn kual zel mah ila, ‘thin’ tih tel lo vek a nih a rinawm!

Saptawng Bible-ah ‘thin’ tih lang lo vek mah sela, Mizo tawnga ‘thin’ a tel hi a dik tho tho a ni. A chhan chu Thuthlung Thar ziahna tawng (original language) hi English a ni lovin Grik tawng zawk a ni a, he lai thu lehlinna pawh hi English Bible ni lovin Grik Thuthlung Thar ngei hmanga lehlin a ni. Helai thu hi Grik Thuthlung Tharah chuan, ‘touto poiete eis ten emen anamnesin’ tih a ni a, ‘ti thin’ tih lai tak chu ‘poiete’ hi a ni a. He thumal hi ti tura thupek, ‘imperative mood’ a ni a. Grik grammer-a imperative mood chuan tense a nei zel a, ‘present tense’ emaw ‘aorist tense’ emaw a ni thin. ‘Aorist imperative’ a nih chuan vawi khat ti tura thupek a ni a, a hnu leh zel a keng tel lo. ‘Present imperative’ a nih erawh chuan vawi khat tiha duh tawk mai tur ni lovin, ti leh zel tura thupek a ni a.1 ‘Poiete’ hi ‘present imperative’ zawk a lo ni mauh mai si a, ti zel thin’ tura thupek a ni tlat. Chuvang chuan kan Lalpan pindan chungnunga a zirtirte nena Zanriah an kil ho khan inthlahna chawhlui an kil ho a ni mai lo va, a lo kal leh hma zawnga kan chan ho zel tur, ama thisen leh taksa ngei hmangin sacrament thianghlim min dinsak a ni zawk. A ropui khawp mai!

He thu vek hi Paula pawhin 1 Korinth 11:25-ah a sawi ve a. Chutah pawh chuan ‘poiete’ tho a hman avangin ‘ti thin’ tih bawka lehlin a ni. Thuthlung Thar lehkhabu ziaktute zinga Grik tawng thiam ber ber pahnih Luka leh Paula te hian an tisual lovang tih ring ila. Sapho pawhin an lehlin fuh zan loh kha kan Mizo Bible letlingtuten dik tak maiin an lo letling hi a lawmawm hle mai. A thuhrimah ‘thin’ tih awm lo Bible hmangtu Saphote pawh khuan keini ang thovin Lalpa Zanriah hi a khat tawkin an kil ve thin tho va. Chuvangin Krista ropui taka a lo kal leh hma loh chu Lalpa Zanriah hi lo kil ho zel tur kan ni e.

(Footnotes)

1 “The present imperative denotes a command or entreaty to continue to do an action, or to do it repeatedly.” J. W. Wenham,

The Elements of New Testament Greek

. 1982, p. 74.

LAWRKHAWM

Business Meeting neih tur: Karleh Tawngtai inkhawm ban (4 Oct, 2011)-ah Business Meeting neih tur a ni a. Member zawng zawng kal tura beisei kan ni. Department hrang hrang Reoprt ngaihthlak a ni ang.

Lengpuiah Revival Camping: Kan Kohhran (7th Day Tlang) buatsaihin Lengpuiah Tunkar nilaini atang khan kohhran dang mite huapin Revival Camping buatsaih a ni a. Kan kohhrana hruaitu thenkhatte’n an chamchilh mek. Pastor Rodingliana leh Upa S Lalkamlova te Speaker an ni.

Remnant Revival Team Delhi-ah: Speaker Pu Lalthlamuana (Patea) leh Treasurer Pu Ralkapzauva te New Delhi-a Revival Crusade neia an kal pawh tluang taka Revival Meeting an neih hnuah tunkar nilaini khan dam takin an lo thleng leh ta. Revival Meeting hlawhtling tak an neih thu Speaker Pu Lalthlamuana (Patea) hnen atanga dawn a ni.

Pr Lalhluna Kolkatta-ah: Pastor Lalhluna chu tunkar nilaini (28 Sept) khan in-checkup turin Kolkatta-ah hruai a ni. Ani hi lung lam tha lo avangin tunhnai khan Damdawi inah hun eng emawti chhung enkawl a ni. Damna tha tak a chan leh thuai kan duhsak e.

Mizo Conference Office Staff lo haw: Sept. 18-a Mizo Conference Office Staff-te New Delhi-a Excusion-a kal chu, Sept. 28 khan Aizawl an lo thleng leh ta. An hlim hle nia thu dawn a ni. Tunah chuan Officer zin-te pawh Office-ah dawr theihin an awm leh ta.

North-east Pumpui inzaisiak top 3-ah tling: Lalbiakdiki (BDI) d/o C Lalrosanga kan Kohhran member tuna Chanmari venga khawsa mek chu North-east pumpui zaia intihsiak Doordarshan-in a buatsaihah a thiam pathum (3) thlanah tling chho zelin December thlaah Guwahati-ah Final neih tur a ni.

Naupang Zing Tawngtai Inkhawm: Naktuk Sabbath zing naupang tawngtai inkhawmah Dr Eileen Rinpuii thusawitu a ni ang a, Sweety Swansi tantu a ni ang.

24 September, 2011

CHILDREN’S MINISTRIES HNATLANG NEI: 7th Day Tlang kohhran Children’s Ministries Department chuan September ni 18 (Sunday) zing khan Community Work an nei a. Naupang 60 chuang zet an thawk chhuak. Conference Workshop bul te, Kanan Veng pan thlakna Step te leh Pu Sangtluanga (L) kawt te an tifai. Zing dar 6:00-ah thawk tanin dar 9:00 thleng an thawk a ni.

SUNDAY-AH PATHIAN THU ZIR HONA:Pu Zosiamliana hovin September 25, 2011 (Sunday) hian 7th Day Tlang Kohhran naupangten Bible zirna neih leh tur a ni dawn a, zing dar 10:00-ah Fellowship hall-ah kim taka kal tur a ni. Bible, Adventist hla bu leh Tiffin ken ken theuh tur a ni a, pen leh note bu ken bawk tur a ni.

ZIRNAA HLAWHTLING
C Lalnunpuii d/o Lianchhumi chu tunkara BSc Nursing Result chhuakah khan Mizoram pumah 2-na niin Mizoram College of Nursing atangin Result tha tak a nei a. A hlawhtlinnaah a lawmpuiawm hle.

BUHFAITHAM KHAWNTU TUR
October leh November thla chhunga buhfaitham khawn turin hengte hi ruat an ni:
Mission Compound : Nl Hmangaihsangi & Nl Lianzuali
7th Day Tlang te : Pi Parmawii & Pi Zirkungi
Upper Kanan : Nl Dindini
Zotlang/Chawnpui : Vaninmawii & Lalthakimi
KC Thanga Complex : Nl Linda & Lalnunziri
Vaivakawn : Lalremruati & Mahmuni
Chawnpui : VL Ruati & Dansangi
Middle Kanan : Pi Zovi Sailo
Hospital Complex : Inpuii (?) & Enpuii


COMMUNION SERVICE DUTY TURTE:
4th Quarter, Lalpa zanriah neih huna Deacon Duty turte:
Chhang leh Uain sem tur: 1) Pu F Lalhriatpuia
2) Pu PC Lalthlamuana 3) Pu Chawngsiampuia 4) Pu C Zomuana 5) Pu Zothanzuala
6) Pu Joseph Lalmuanpuia

Tui buaipui turte: 1) Pu Daniel Tete 2) Pu Vanlalhluna
3) Pu R Lalhmachhuana
Sabbath Zing naupang Tawngtai: Naktuk Sabbath zing tawngtai inkhawma thu sawitu tur chu Pu Zosiamliana a ni ang a, dinpuitu tur chu H Lalrinsangi a ni ang.

Business Meeting hnai: Business Meeting a hnai a, Department tinin Report fel tak neih theih nan, report an buaipui tan mek. Department hrang hrangte inbuatsaih tura hriattir an ni

Keimahni: Remnant Press hnathawktute Delhi lama an zin avangin Ay Kantu Xerox-a tihchhuah a ni a, a phek a tam thei lo va, pawi kan ti hle. Karleh lamah chuan a pangngaiin a chhuah theih tawh a rinawm.

16 September

COURTSHIP & MARRIAGE

Nizan (Sept 15) khan Conference -in Courtship & Marriage Sub committee a din chu Executive Secretary kaihhruaiin a room-ah meeting neih a ni a, Adventist mi leh sa ngei inneih theihna tura hma lak dan tur hrang hrang an rel.

Adventist Thalai duhawm tak tak, an nulat tlangval laia, kohhran thalai hruaitu fel tak tak ni thinte’n Kohhran an chhuahsan fo thin chhan lian ber mai chu Kohhran dang nupui pasala an neih thin vang a ni. He lamah hian hruaitute tan tan lak a tul hle reng a. Mahse, thil awllai tak erawh a ni hauh lo vang a. Taihmak leh remhriat a ngai ang.

Plan fel tak nei a (Case Study kan ti dawn nge) thil awm dan zir chian hmasak a ngai a. Data lak khawm a, chu data chu mumal taka remkhawm a, thlirna chi hrang hranga thlir ho hnuah ruahmanna siam a ngai a ni. “Hmanah pawh hetiang hian an tia, a tha khawpin ka hria,” tia tih ve ngawt hian thil tha a thlen tam vak lo thei.

Mizorama Kohhran lian ber Presbyterian chuan KTP unit tinah inelna thianghlim takin inelna an buatsaih a. Chu inelnaah chuan KTP Unit leh tinin Kum khat chhungin Kohhran Dan thianghlima innei engzat nge an neih? tih hi a ni. A number tam lam ai mahin, Dan 2-na emaw, kohhran dang nei emaw kha Report tel a ngai a. Chutiang a nih avangin Dan 1-naa innei tam hle mah se, Dan 2-na leh kohhran dang nei an tam zawk tlat chuan an Record a chhe tho tho thin. Chu chuan Thalaite thinlungah Dan 1-na hlutna a tipung a, chutianga inneite chuan ngaihhlut an hlawh phah thin.

SABBATH SCHOOL ZIRLAIBU

Fourth Quarter Sabbath School zirlaibu zawrh chhuah a ni dawn a, a man chu a pangngai ang a ni ang. Chanchin buatsaih lai hian English a lo la thleng lo va, Mizo Conference atanga kan hmuh ang chi kha chu lei theihin a awm dawn a. A baa lak a ngaih loh nan i inring theuh ang u.

ARTIFICIAL LIMB CAMP

Kut/ke lem (Artificial Limb) camp Rotary Club of Aizawl in January 2012 ah a buatsaih dawn a. Hetiang lama harsatna nei a, hre chiang duh tan heng No.-ah hian zawh chian theih a ni e.

Contact: 9436142013/9436140101/9436143503

EDITORIAL

Kohhran leh Khawtlang

Hmanni chu zirtirtu pakhatin a naupang Test a pe a, an zinga pakhat chuan a lo entawn tlat mai a. Zirtirtu-in a han man takah chuan a chhuanlam a sawi ta a, “Sir, min hre thiam rawh. Tunlai chu Chang kan zir thin a, zing tin leh tlai tin chhuah a ngai a; lehkha pawh ka zir hman lo a ni,” tiin.

A nuihzatthlak viau angin a lang naa hemi phenah hian thu pawimawh tak a inphum awm e. Pu Vanneihtluanga chuan, entrepreneurship Trainee te hnenah, “In hnuaia thawk turin Kohhran leh khawtlanga inhmang aiin inhmang lem lo zawng rawh u, chung chu i duh angin i chhawr tangkai thei zawk ang,” tiin a hrilh.

Kohhran leh Khawtlanga inhman a tha lo ve tihna ni lovin; kohhran leh khawtlanga inhmang thenkhat hian an eizawnna (Profession) hi an ngaihthat a, an hnain a tuar thin a ni. Kohhrana mi tangkai tak, mahse hnathawhna hmuna a huna thleng ngai lo leh, kohhran leh khawtlang thil avanga Leave la fo mai kan nih chuan kan hotute leh kan thawhpuite phurrit siamtu kan ni reng thei a ni.

Leave la chiah lo leh thiante tibuai chiah lo pawhin mahni hna thawhrim tur anga thawh loh phah nan a hman theih bawk. Chuvangin Kohhranah kan inhmang a nih pawhin, kan thawh theih tawk leh kan tlin tawk kan thawh thiam a pawimawh hle mai. Chutiang bawkin, hotute pawh hian, “Ani hi a tlawmngai thei,” tih vanga mi pakhat kuta mawhphurhna nghah teuh mai hian mi nunah harsatna kan thlen thei tih kan hriat thiam a pawimawh awm e.

Ni tina kan eizawnna leh chhungkaw enkawlna ber kan tih that loh chuan rawngbawlna dang chu a tla na har duh hlein a rinawm a ni.

HUN HLUTNA

Hlawhtlinna Lamtluang

Uluk taka ka han thlir vel hian, thenkhatin hun an khawhral mai mai lai hian, chu hun vek chu midangin hlawhtlinna remchangah an lo hmang tih ka hmu.~Henry Ford

Hun hi darkarin kan tihek huau huau ngai lo. Mitkhap kar te te hian kan tihek a ni. Vel mawng rereuhtea pawp pawh hi nikhua a rei chuan bel ruak ang tho a ni. ~Paul J Meyer

Tunge lal zawk? Hun hmangtu nge hun neitu? Hun hi kan hman tangkai rual chiah hian hun hi kan hmangin kan thunun tihna a ni. Kan han tangkai loh veleh hun hian min hmangin min thunun nghal thin. Mi pahnih inang lo tak mai an awm a, pawn lamah chuan inang chiahin darkar 24 pek ve ve an ni a, chhung lama an danglamna siamtu chu an hman tangkai dan inang lo chu a ni.

Mi tam tak chuan ni tina an hnathawh tura an hmachhawp hi an lupan hnathawh a, ngaihtuahna tak tak an seng lem lo. Han chut let vang vang pawha puitling tana hun khawhralna atan chauh nuihzatthlak khawpa hun tam seng ralin hna tlemte an thawkchhuak a, ngaiah an neih a, a pawina an hre lem lo a ni. An thawh let tam tak thawkchhuak thei tur khan tlemte chauh an thawk chhuak thin.

Hun hi, thil dang zawng aiin, ruahman lawkna leh hmachhawp duan fel loh vangin a riral nasa ber a ni an ti. Charles C Gibbons-a chuan,”Hun ran dan tha tak chu ngaihtuah lawkna leh ruahman lawkna fel tak siam hi a ni. Inngaihtuah lawkna atan minute nga i hman avang hian darkar khat lai hun tihekin hna chuang i thawh loh phah thei a ni.” tiin a sawi.

Hun ren kan sawi hian, hun tak tak hi va ren leh hman thiam vak theih a ni tak tak lo. Mahni inenkawl fel hi hun renna chu a ni mai. Inthununna leh phurna tlakchham vangin ni khata kan tihtur tih tak loh tam tak kan nei thin. Thenkhat hi chuan hma lam pan aiin hahchawlh hi nuam kan ti ve hrim hrim bawk. Thil tih hun a nih laia tihtur dik tak tih peih loh vanga hlawhchhamna hian hlawhtling tur tam tak beidawngin a siam thin. Thatchhiatna tlanbosan tur hian (1) hmabak ruahmanna tura Dairy leh notebook neih te, (2) mahni hnathawhna hmun ngai leh rilru sawrbingna tikhaihlak thei lak atanga inthiar fihlim te, (3) thil eng pawh tih dawn reng renga a hma thei ang bera bul tan te hi a tangkai hle a ni.

Thinrim, lunglen, lusun, mi ngei leh $ts$k tih ang chi hian mihring nun hi tam tak a khawhraltir a ni. Heng thil hi “i chungah thlentir suh!” tih theih a ni lo. Mihring nuna bet ve a ni. Mi tinin kan nei vek. Mahse, kan hmachhawn dan a inang lo em em thung a ni. Hetiang vanga rei tak inup buai ai chuan, puak keh vat ila, tap ila, kan rilru hahna zawng zawngte hi sakhaw puipate bulah emaw, kawppui leh thiante bulah emaw te han inphawrh fai vek ila, kan nuna thil inup tam tak hi sawi chhuak vek ila, chu chuan min tiengthawl a, nunphung pangngai min neihtir leh thuai thei a ni.

Machine gun preacher

by Tpa

Sam Childers chu kum 1962 khan North Dakota, USA-ah a lo pianga. A naupang lai chuan Pathian a ngaihsak thin a, mahse high School a kal lai chuan zu leh ruitheih thil khawih tan a. A nun chu rutheih thil leh a khawih nasat avangin a buai ta hle a, zu leh drugs addict niin hun rei tak chhung a khawsa a. Hemi hun lai hian Motorcycles khalh thin pawlah (gang) telin insual a hrat hle. Hetianga bawraw taka a nun a hman lai hian Pathianin amah ala hman dan tur chu a hre lawk kher lovang.

Kum 1992 khan Pathianah piantharna a chang ta hlauh mai a. Kum 1998 khan Africa ram pakhat Sudan a tlawh a. Sudan rama hel pawl pakhat ‘Lord’s resistance army’ hovin naupang chunga an chet dan chuan a rilru a khawih hle a. Lord’s resistance army (LRA) hotu chu Joseph Kony a ni a, an pawl hian naupang 30,000 chuang a ru bo tawh a. Mipa naupang tam tak an ruk bo chu an nu leh pa an thah luihtir a, chuan sipaiah an tan luihtir thin a. Hmeichhe naupang chu an pawngsual a, nawhchizuar atan an hralh thin a ni.

Sam-a chuan an ram lama a sumdawnna hlawhtling tak kal lai mek chu kalsanin, Sudan ramah hian fahrah enkawlna a siam ta a. Sam-a hian naupang enkawlna a siam “children village” ah hian naupang 200 vel an awm mek a, LRA ho kut atang hian naupang 1000 chuang a chhanchhuak tawh a ni. Sudan chhim lama fahrah enkawlnaah chuan children village hi a lian ber a ni.

Sam Childers-a hian naupang ven nan leh LRA kut atanga chhanchhuah nan hian silai a hmang thin a. Sam-a chuan tharum thawha chet chu duh lo hle mahse, napang ruk bo an thah leh pawngsual mai thin avangin AK-47 silai kengin a veng thin a, chuvangin ‘machine gun preacher’ tiha hriat a ni bawk. Sudan rama tanpui ngaite tanpui tura ram dang atanga pawl lo kal NGO an awm nual a, ram chhunga buaina leh indona a chhuah chuan Sudan ram chu an chhuahsan thin a, a ralmuan hunah an kir leh mai thin. Mahse a pawlte chu ram chhungah buaina emaw, indona pawh awm mah se, an chhuak ve ngai lo a ni. A harsat ber lai pawhin a rawngbawlna chu a chhunzawm reng tho a ni. A hi a rawngbawlnaah hian a nupui leh a fanu pahnihten an pui thin a. Heti hian kum 13 vel chhung chu Pathian hmingin Sudan ramah naupang enkawlin a hun a hmang tawh a ni. (http://miz.tanpuia.com/2011/09/13/machine-gun-preacher/#more-332)

LAWRKHAWM

Birthday Programme:Naktuk Sabbath School-ah Birthday lawmna hun hman a ni dawn a, July, August, September thla chhunga piangte chu Sabbath School hruaitute’n thutna tura an ruat lawkah thut tur a ni a. Naupangte pawh Birthday lawm turte chu Biak in puiah inkhawm tur a ni e.

13th Sabbath: Karleh Sabbath khi 13th Sabbath a nih dawn a, chanvo nei tur - Chang sawi tur emaw, Fakna hla bik sa tur emaw te chuan naktuk inkhawmah Sabbath School hruaitute hnenah inhriattir tur a ni.

Remnant Revival Team Delhi-ah: Speaker Pu Lalthlamuana (Patea) leh Treasurer Pu Ralkapzauva te chu New Delhi-a Refugee Camp-ah Revival Crusade nei turin nimin khan New Delhi an pan. September 16-27 chhung rawngbawlna hi neih tum a ni.

Pr HB Lalkhawliana US-ah: Pastor HB Lalkhawliana leh Pi Lalremi chu Mizo SDA Kohhranin Function an neihna hmanpui turin US-ah an kal. Tin, Nl Romalsawmi pawh US-ah chhungkaw thil pawimawh avangin a thang mek bawk.

Mizo Conference Staff New Delhi-ah: Karlehah Sept. 18 khian Mizo Conference Office Staff-te chuan New Delhi-ah Excusion an nei dawn a, Sept. 28-ah Aizawl lo thlen leh hman an tum. Officers zingah heng- Upa Lalnllawma Colney, Pu Daniela Sailo, Pi Nunthari Sailo, Pastor PL Thlenga te hi kal ve an tum avangin dawr duh chuan an lo hawn hun nghah a ngai dawn a ni.

Thalai inkhawmpui T-Shirt: Thalai inkhawmpui T-Shirt, Nl H Lalhmangaihsangi hnen atang a lei theih ta e. Rs. 250/- man a ni. Neih vek kan tum dawn nia.

Helen Lowry School: September 13 &14 khan Inspection neih a ni a, Inspection hi Pi Nunthari Sailo, Pastor P Kullu, Upa S. Lalkamlova, Upa Lalnilawma Colney, Dr F Lalnunmawia ten an nei a. Inspection Result hi tihchhuah nghal a ni a, Helen Lowry School Grade chu ‘C’ a ni.

September 9

Lengpui revival camping-pui dawn

            Lengpui Kohhranin kan kohhranah Revival Camping neihpui tura min ngenna chu Church Board meeting-in a ngaihtuah a, rem a tihpui hnuah Personal Ministries Committee kutah a hlan chhawng a. Personal Ministries-in tawngtai inkhawm ban khan a ngaihtuah a. Speaker atan Pastor Rodingliana, Upa S Lalkamlova leh Pu Zothanzauva te a ruat a. Nilaini khan Lengpui Kohhran hruaitute leh Personal Ministries Committee Member thenkhatin Joint meeting an nei a. September 23-a tan a, October 2 thleng neih tum a ni. Kohhran member tan Camping neih phawt a ni ang a, midang tan a hnuah chhunzawm leh tura ruahmanna siam a ni.

Aizawl West Children’s Ministries

       Aizawl West Circle naupang inkhawmpui November thlaa neih tur atan naupang eng emaw zatte chuan Drama leh hla (Group & Solo) an zir tan ta. Naupang zaipawl hle tur pawh zir tan thuai tum a ni.

                        Aizawl West Circle Children’s Ministries OB-te pawhin  inkhawmpui tur chungchang September ni 8 (Thursday) khan Pu C Lalnuntluanga te in, Maubawk-ah tlai chaw eiin Committee neih a ni.

Bible Society collectors

       Hengte hi Kum 2011 chhunga kan Kohhran chhunga Bible Society Collector turte an ni: Pu Laldinthanga- Convener, Pu R Lalhmachhuana- Secretary, Pu Danmawia Khiangte, Pu Ramhunthara, Pu F Lalhriatpuia, Pu C Zomuana, Pu Joseph H Lalmuanpuia, Tv Nunchanga.

Kum 2011 chhunga kan Kohhran Target chu Rs 31,000/- a ni a. Donation pe duh emaw Membership fee pe duh emaw Anniversary thilpek pe duh emaw te tan kan remchan dan ang zela thawhlawm pek theih a ni. Heng kan hming tarlanah te hian zawhfiah theih reng a ni a, a duh tan pek theih reng a ni e.

Kohhran zaipawl Puan pe

                                    Pi Rinmawii w/o Zosiamliana chuan Kohhran Zaipawl form tur puan a tum sak a, zaipawl hruaitute leh Member-te an lawm hle. Rawngbawlna leh biak in cheina atan mimal-in thil hlu tak tak an pe thin a, Kohhranin hma a sawn phah hle a ni.

Thawhlawm khawn

Thawhlawm khawn chungchang Lengzem chanchinbu-in a tarlang hi thenkhat, Kan kohhran mila her remin kan han chhuah chhawng ve ang e. Kan tangkaipui takin:

Bill emaw thawhlawm emaw khawntute in ina an lo kal hian engtin nge in lo chhan thin le? Chhungkaw thenkhat chuan, “Puitling kan awm lo.. tlaiah lo kal leh rawh,” tiin chhuanlam remchang apiang kan siam kual a, chhuanlam siam tur kan hriat loh tawpah ka pe chauh ang deuh a ni.

Chanchinbu kan la duh a nih chuan a man kan pe tur a ni. Church Building Fund leh Danial Pawl Thawhlawm Goal kan insiam a nih chuan kan pe mai tur a ni. Goal kan insiam a vawi 2 vawi 3 khawn nawn ziah ngai kan nih te hi thil zahthlak a ni. Kan nei lo pawh a ni lo, kan ngaihthah a ni ber fo.

A tlangpuiin, hetia thil khawntu tihkhawtlai chingte hi, a khawntuah an tang ve ngai lo a ni duh khawp mai. “Eng vangin nge kan chhungkua hi khawtlang leh kohhranin thawhlawm khawnah min ruat ve ngai loh le?” tihte pawh hi ngaihtuah chhuah nachang htiat awm tak a ni.

Cheng 50 lek vang hian chhungkua tihmualpho theih a ni tih i hria ang u. An rawn khawn hun awm hi kan hre vek a. Chhuanlam siam a, “Lo kal leh rawh,” tih ai chuan, ina awm apiangin lo pek mai theih tura lo inrin lawk hi chhungkaw fing tih dan a ni.

Hei hian mi mal nun ai mahin chhungkaw pumpui nepzia leh inthununna tlakchhamzia a lantir a ni. Chutiang chhungkua atanga chhuak chu nupui pasalah i nei duh ang em? Chutiang chhungkua ami nen chuan sumdawnna tih dun a him ang em? Ngaihtuah a ngai e.

PASTORAL PRAYER

~Zothanzauva Pachuau

Joint Editor

            Khawvela kohhran tam tak zingah hian Seventh-day Adventist kohhrante hi inkaihruaina nei mumal ber pawl kan ni hialin ka ring. Tualchhung kohhran atanga General Conference thleng hian inkaihhruaina tha tak kan nei a, hei ngawt pawh hi thil lawm awm tak chu a ni. Inkhawm kaihhruaina pawh hi kan thenawm kohhrna unau dangte tih dan ang lo deuhin kalphung hran kan nei a, hei hi a tlangpuiin khawvel pumah kan tihdan a in ang. A bikin Vesper, Sabbath School leh Divine Service inkhawm phei hi chu khawi hmunah pawh kan hman dan a in ang lehzual. Hei hian khawvel puma Adventist-te kan inpumkhatna a tilang hle a ni.

            Thianghlimna inkhawm kan tih (Divine Service) hi Adventist te’n Pathian kan biaknaah chuan kan dah pawimawhin kan duhtui lehzual a. He huna thusawi tur leh ding chhuaka chanvo chang tur ngawt pawh hian member awm remchang a piang hman ngawt a rem lo. Kan thurin leh rinna kawnga mi puitling deuh zawk te’n chanvo pawimawh an chang hram hram thin.

            Divine Service inkhawm tanna hla sak zawh hian thingthi-a tawngtaina hun hman a ni thin a, he tawngtai hi a pawimawhin mi nazawng chan turah pawh an dah ngai lo, he tawngtai hi a sap tawng chuan, ‘Pastoral Prayer’ tih a ni. He pastoral prayer hi a tlangpuiin Pastor/Elder ordain-te’n an chang deuh kher thin. Pastoral Prayer hlantute pawh hian kar tluana kohhran member hna hrang hrang thawk, lo kal khawmte tana tisa leh thlarau lam malsawmna te, lawmthu sawina leh kohhran hruaitu leh rawngbawltute tan mai bakah Thuhriltu tana malsawmna leh dilna an thlen thin.

            Keini Seventh-day Tlang, Mizoram Adventist kohhran tana Model Church, Headquarters Church-ah hian pastoral prayer kan hman dan hi kan namnul deuh em? A chang chuan he pastoral prayer hi hmeichhia leh ordain ni lem lo te’n kan hmang ve leh mai thin. Mi indaih lohna hmunah chuan hetianga tih chang hi chu awm ve bawk mah se, keini Seventh-day Tlang kohhranah hi chuan uluk deuh zawka hman dan a awm mai lo maw? Elder 7 leh service lai pastor bakah pensioner eng emaw zat an awm a, remruatna tha deuh zawk siam a nih chuan hmunpui lama an tih ang hian kan ti ve thei maiin ka ring.

DISPENSATIONALISM

Laltanpuia Khiangte

Dispensationalism tih hi Europe leh America rama an Pathian thu kalpui dan pakhat a ni a, kum 19-na chawhma lam atanga rawn lar chho tan a ni.  Liberal zirt$rna lo chhuak dodaltu ber a ni a.  A bul tumtu deuh ber chu John Nelson, Darby-a a ni a, ani kha Playmouth Brethren pawl dintu a ni bawk a ni.  Darby-a hian hrilhlawkna thu leh kum sang rorel (millennialism) te hi a tuipui hle thin a.  A zirt$rna hi America rama mi tam takten an lo tuipui ve a, chung mite nen chuan Dispensationalism bul tantu an lo ni ta a ni.

Darby-a leh a thuihruai, kum sang rorel tuipuihote (dispensationalists) hian Liberal zirt$rna firfiak chu dodalin, Evangelical zirt$rna thenkhatte chu firfiak takin an kalpui ve thung a.  Bible thute hi dik lo thei lo a nih avangin a ziak ang thlap thlapa pawm mai tur a nih thute an sawi uar hle thin.  Hun hnuhnung thurin hian an ngaihtuahna a chiah hneh hle a.  Kum sang rorel thu phei hi chuan an Pathian thu kalpui dan a kaihruai hneh hle a ni.  Daniela bu leh Thupuan bu te hi tanchhanin khawvel hun hi hun (dispensation) sarihah an then a.  Hun sarihna, kum sang rorel hun chu a lo thleng tep tawh niin an sawi a ni.  Thuthlung Hlui huna Pathian mite kaihruai thintu Dan chuan tangkaina nei tawh lovin an ngai a.  Thupek sawm (Decalogue – Ten Commandments) pawhin Kristiante tan pawimawhna leh hlutna engmah nei tawh lovin an zirt$r bawk a ni. 

Kum zabi 20-na t$r lama Larkina zirt$rnaah phei chuan Protestant zirt$rna kalhin, Genesis bua thil siam chungchang hrilhfiah nan Science zirt$rna eng emaw chen kalpui a ni a.  “A tirin Pathianin lei leh van a siam a,” tih thute hi tuna kan chenna khawvel ni lo, kum maktaduai tam tak liam tawha mihring tluk vanga tihchhiata awm tawh lei hmasa leh van hmasa sawina angin a zirt$r a.  Ni ruk chhunga thil siamte hi chu lei leh van hmasa khuh pila awm tawh, koh chhuah leh mai niin a sawi a ni. 

Naupang 31-in Baptisma an chang

Kan Kohhran Children’s Ministries Department hmalaknain July ni 22-25, 2011 khan Salvation Camping neih a ni a, Pu Zosiamliana Speaker-ah hman a ni a. Chumi hnuah Follow up Programme neih chhunzawm niin Bible Zir honate vawi tam tak neih a ni a. Pu Lalrinsanga’n Baptisma Class a neihpui leh hnuin naupang duhawm tak tak sawmthum leh pakhatin September 31, 2011 khan Baptisma an chang ta a. Heng naupangte hi Puitling leh upa lam zawkte’n fimkhur tak leh dimdawi taka kan enkawl a pawimawh hle awm e.

Division leh Union Youth Director lo kal:Division Youth Director Pastor Ravindra Shankar leh Union Youth Director Pastor P Kullu te Youth Leadership Training min neihpui turin an lo kal.

T Shirt lei tur tlem awm: October thlaa Mizo Conference huam chhunga Adventist thalaite inkhawmpui lo awm turah a thlengtu Branch Serchhip Branch chuan T Shirt an siam a, kan kohhran pawhin 10 vel kan chang ve a, a lei duh tan AY Leader-te hnen atanga lei theih a ni e.

Sabbath zing naupang tawngtai inkhawm: Naktuk Sabbath zingah naupang tawngtai inkhawm neih leh tur a ni a. Tantu: Malsawmzela Tlau a ni ang a, Pi Lalramhluni Tochhawng thusawitu a ni ang.

Upa Lalnilawma Hospital-ah: Upa Lalnilawma Colney chu chanchin buatsaih lai hian Adventist Hospital-ah enkawl mek a ni a. Ngaihtuahawm erawh a ni lo. A Dam thuai theih nan i tawngtaipui ang u.

Kanhmun Biakin hawng: Karhmasa Sabbath (Sept 3) khan Mizo Conference President Pastor R Biakthansanga’n Kanhmun biak in thar a hawng. Kanhmunah hian nikum lamah khan Quarters sak zawh a ni tawh a ni. Biak in Platform leh thutthleng inkar kalna chhuah tile -te leh kohhran khuangte member thahnemngaite thawh a ni. Kohhran member 28 an awm mek a. Tunah hian Evan. Lalramnghaka Ralte-in a enkawl mek a ni.

Elder Pu H Zidinga te zin haw: Upa H Lalzidinga te nupa sap rama zin chu tunkar ningani khan an lo thleng leh ta.

Helen Lowry School: Vawiin (Sept 9) atang hian Pawl 11 leh 12-in Term exam an tan. Karleh (Sept 13, 14) khian Helen Lowry School hian Inspection an hmachhawn dawn a ni.

AY Meeting-a Musician turte: Keyboard - Tv David Lalramchhana, Guitar - Tv Zoremmawia Pachuau, Bass -Tv Lalrosanga, Drums -Tv Lalnuntluanga

2nd September, 2011

Zaninah Evangelism Fund: Zanin Vesper inkhawm hi September thla Sabbath zan hmasa ber a ni a, kan tih thin dan angah chuan Evangelism Fund khawn hun a ni a. Inring ang u.

Sabbath zing naupang tawngtai inkhawm: Naktuk Sabbath zingah naupang tawngtai inkhawm neih leh tur a ni a. Tantu: Deborah a ni ang a, Pi Nunthari Sailo thusawitu a ni ang.

Conference hotute zin: Upa Lalnilawma Colney Hmarkhawlian-ah a zin a, Pastor PL Biakchhawna Serchhipah Department Promote-in a zin bawk.

Naute nei: Pu Daniel Tete leh Pi Sawmi Sailo te chuan tunkar nilaini khan Adventist Hospital-ah fanu duhawm tak an nei. An lawmpuiawm hle mai.

Kohhran Sum Audit: Tunlai hian Aizawl khawpui chhunga Kohhran sum Audit hna thawk mek a ni. Stewardship Depertment Director Pastor VL Sanglura hovin Pu Zakhuma Ralte leh Pu Vanlalnghaka Chhangte ten an nei a ni.

Samuel Zaithanpuia Memorial Football Tournament Final: 7th Day Tlang Pa United FC chuan HLS Hostellers 2-0-a hnehin a vawi 4-na atan Champion no mawi an chawi leh ta. Zemabawk FC pawhin Azova Memorial FC hnehin Pathumna lawmman an dawng bawk.

Naupang Divine Service: Naupang Divine Service inkhawma chanvo neitu turte: Thusawitu- Pi L Rotluangi, Welcome: Pi Lalhruaitluangi, Dinpuitu: Lalbiakdika, Lalawmpuia Kawlni. Fakna Hla: Lalhruaitluangi (Tluangtluangi) & Friends, Vanruatsanga. Thawhlawm: David, Alex, Thlamuanpuia. Zai hruaitu: Tv C Lalnuntluanga.

Insawn: Kan Circulation Manager Pi Lalhruaitluangi leh Pu Lalramluna te nupa chu Chawnpui veng atangin Helen Lowry School Quarters, Pu F Lalhriatpuia te in luah hnuaiah tunkar Sunday khan an insawn.

SURIA NGE EDOM ZAWK?

Kar hmasa chhuakah khan Thuthlung Thar lam kan sawi a, tun tum chu Thuthlung Hlui lam ami i’n thur chhuak ve thung teh ang.

“Chung lai chuan Suria lal Rezina chuan Elath khua chu Suria ram atan a la leh a, Judate chu Elath khua ata a hnawtchhuak a. Suria-ho chuan Elath khua chu an va luah a, tun thlengin an la awm a” (2 Lalte 16:6).

He lai thu hi indo chanchin ziakna a ni a. 2 Lalte 16:5 ah chuan Suria lal Rezina leh Israel lal Peka chuan Juda lal Ahaza an do rawn a. Jerusalem pawh an hual a; mahse an la thei lo tih kan hmu a. Chutih laia Jerusalem piah a awm, Juda ram chhim lam daiha mi Elath khua va lak leh theih daih si chu thil inhmeh lo tak a ni a.

2 Lalte 16:6 hian a sawi tum tak chu Suria leh Israel lalten Juda lal an tihbuai lai chu remchanga lo hmangin Edom lalin Juda ram khaw pawimawh pakhat Elath a lo lak thu niin a lang a. Suria tih hi Hebrai tawng chuan Aram tih a ni a, Aram tih leh Edom tih chu Hebrai Bible-ah chuan D leh R tih chauh loh chu a spelling a thuhmun vek a ni. Hebrai tawngah chuan D leh R hi inang tak a ni a, fimkhur loh chuan ngaihpawlh palh theih tak a ni. Chuvangin he laiah pawh hian copy chhawnna lamah, Edom tiha D dahna hmun tR an lo dah palh a nih hm>l a, Edom tih aiah Suria (Aram) tih a lo ni ta mai niin a lang.

Juda-te chanchin hlui (history) han chhui kir pawhin englai mahin Suria-in Elath khua an luah hun a awm lo va. Edom erawh chuan an luah tawh thin ngei tih hriat a ni thung. Chuvang chuan Saptawng Bible lehlin thenkhat (Revised Standard Version, New Revised Standard Version, New English Bible, Revised English Bible, New Jerusalem Bible, leh New American Bible te hi chhiar la)-ah chuan “Suria” ti tawh lovin “Edom” tiin an dah tawh a, Mizo Bible lehlin thar, Common Language-ah pawh “Edom” tia dah a ni ve tawh a ni.

Hlimna Ni

            Sabbath hi engtin nge i hman thin? Hlimawm i ti em? Seventh-day Adventist-te hi Dan zawma thiam chan tum niin min sawi fo thin a. A chhan pawh Thu sawm pek kan ngaihpawimawh vang a ni a. Thusawm pek zingah pawh Sabbath ni phei hi chu a dang zawng aiin kan sawi zing thin. Chutiang ngaihdan lo siam thei tur takin thenkhatin Sabbath ni a tih thiang lo tam tak kan insiam a, Thianghlim leh urhsun taka Sabbath kan serh chuan Pathian kan tilawm thei ang, tih ngaihdan nei angin kan lang fo thin. Chutiang avang chuan hmanlai Juda hunlaia Sabbath phurrita an neih hunlai ang khan Sabbath ni chu hlimawm takin kan hman loh phah fo thin.

            Sabbath ni chu chawlhkar dang zawng aiin ni hlimawm a ni tur a ni a. Nidanga kan lo hahna te, kan hrehawmna zawng zawng lak atanga kan zalenna ni a ni tur a ni. Thusawmpek palinaah pawh a lang a. Pathian chu siamtu a nihzia lanna a ni a, Pathianin hun hnuhnunga a mite a Chhinchhiahna tur a ni a. Pathiana a mite’n lawmna an neih lohna turin Setana chuan Pathian mite a beihna a ni dawn a ni.

            Setana tan chuan ringtute thinlunga Sabbath serh hi vanram kaina kawng anga lantir hi hna pawimawh tak a ni awm e. Chu mai ni lova, Sabbath ni chu ni hlimawm ni lo va, ni huphurhawm taka a lantir theih a, Naupangin ral thuai thuai se an tih tur khawpa a lantir theih phei chuan a tan chuan hlawhtlinna lian tak a ni ringawt mai dawn a ni. Sabbath ni hi Inkhawm lai leh Programme kan neih lai chauh ni lo, a minute tin mai hi hlimawm tak leh nuam tak a ni tur a ni. Nilngin Pathian nena inpawlna hun hlu tak a ni tur a ni a, kan rilrute kan tihharh tharna ni a ni tur a ni. Sabbath ni chu hlimawm taka kan hman chuan Sabbath chu lo thleng leh thuai thuai se kan ti thei ang.

            Zirtawp tlai atang hian Sabbath boruak kan tem tan thei tur a ni a. Sabbath ni chu ni danglam bik a ni a, Pathianin a tihthianghlim leh mal a sawm a ni tih hre rengin Zirtawp tlai lam thleng thlenga buai tak taka thawh tur hna insiam lo ila, Sabbath ni chu kan hmuak a nih chuan a lo thlen hunah pawh hlim takin kan hmang thei dawn a ni.

            Sabbath ni thianghlim taka serh tur hian tih thiang lo leh tih loh tur ringawt kan rilruah awm lo se, angtin nge hlim tak leh Pathian pawl nan kan hman theih ang tih lam hi kan ngaihtuah zawk thin tur a ni.

(AW)

           

NAUPANG   ENKAWL

Naupangte hi  an hluin Leia nu leh paten kan rohlu ber an ni. An aia hlu hi a awm thei chuang lo a, Lunghlu tha mi leh rangkachak engzata tam pawhin kan fate hi kan thleng phal hauh lo ang. Chuti a nih lai chuan kan fate nungchang leh anmahni ngaihsak hauh lo a mahni hna leh mawhphurhna ringawt buaipui nu leh pa tan a awl hle mai. Tawhsual leh thihna hial lo tawk ta se nu leh pa tam takte hi chu kan faten min mamawhna ang leh kan hmangaihna an mamawh ang kan pek loh avangin inchhirin kan kun ngei ang le!  Sum leh pai leh ei tur tha te, thawmhnaw tha leh man to te, in leh lo leh lirthei tha ber ber chite ai pawha an mamawh nasat zawk chu kan hmangaihna leh ngaihsakna hi a ni.

Zirtirtu, nilenga school lama naupang zirtir tawh tan chuan in lama mahni fate zirtir a har duhin thin a chhe duh an ti thin. Kar tluana naupang School-a zirtir tawh hnua Chawlhnia naupang kaihhruai ngai leh thin pawh hi mi tam tak chuan an peih lo a, chhuan lam an zawng thin pawh hi hriatthiam loh lutuk tur a ni hran lo. Naupang kaihruai tur chuan taimak a ngai em em a: mahni fate ringawt enkawl pawh hi hna hautak leh sang tak a ni. Chumi baka midang fate la enkawl leh phei hi chu thil huphurhawm tak a ni a; mi tam tak chuan an peih lo a,ka thiamlo tiin chhuanlam an siam thin.

Kan fate aia hlu hi khawvelah an awm lo. In lama enkawl chu nu leh pate mawhphurhna a ni. Kohhranah pawh anmahni enkawl tur bik Children’s Ministries Department kan nei. Naupang lam Department hi ngaihthah lovin pawn lama rawngbawlna ang thovin an tana rawngbawl hi a pawimawh a ni tih i hre thar zel ang u.

Adventist Choir:August 28, 2011 zan khan 'Adventist Choir' (Mizo Conference Adventist Choir) Board of Director rorel tum 3 na neih a ni a. Choir uniform tura rawtna te pawmpui a ni a, Choir tana sum mamawh ADCOM-a putluh turte ruahman a ni. Zaipawl member Soprano bik tur mi 2 lakbelh tura rawtna chu pawmpui a nih bakah, Choir rawngbawlna tura program ruahman te pawmpui a ni. Adventist Choir hian an chet chhuahna hmasaber atan September 3 Sabbath hian kan kohhranah zaia rawngbawlna an nei ang.

Speaker dah

              Pu Saingura Sailo te chhungkua chuan kan biakin Balcon-a dah atan Ahuja SMX-602 speaker pair (Tweeter made in Italy), cheng engemawzat man chu an thawh. Speaker hi a awmna hmun turah nizan lamah khan Sound System buaipuitu mi thahnemngai thenkhatin an dah nghal a ni. Mi inphalte zarah kan biakin pawh a lo changtlung ve chho zel e. AY Assistant Secretaty thar

                                    AY Assistant Secretary Nl Susan Lalsangpuii chu lehkha zira a awm bo avangin a aiah Tv Lalrintluanga Colney chu tunkar thawhleh zana Church Board Meeting chuan a recommend a, naktuk tih chian a ni ang.

Camping hun sawn

                                    Kohhranin Revival Camping hun tur atana September 9-11, 2011 a ruat hunah Camping neihna tur hmun a remchan loh avangin, kum tawp lamah neih a ni ang.

Bible zir hona nei

                                    August 31, 2011 (Wed) khan Pu Zosiamliana hovin 7th Day Tlang Kohhran naupangte chuan Biak inah nilengin Pathian thu zir hona an nei a, an hlawkin nuam an ti hle.

Naktukah Baptisma chang dawn

            Naktuk Baptisma channa hun hman a ni dawn a, Baptisma chang tur mi eng emaw zat an awm. Naktuka baptisma chang turte hi Adventist ni naupang duhawm tak takte an ni. Thla la turin Kohhranin Tv Zodinmawia Pachuau a ruat a. Ani hian baptisma chang apiangte thla a lo la zel ang a. Midangin lo lak buai ve a ngai dawn lo a ni.