Kum 2006 khan lehkhabu chhe tê ka chhuah ve e ka ti a. He lehkhabu hi kum 20 dâwn lai ka kawl hnua chhuah thei chauh ka ni. Ka ennawn zing ve viauin ka hria a, ka thiamnain a tlin tâwkah chuan tihsual pawh awm mang lo turah dah hial khawpin ka uluk a ni.
Mahse kum 2009 khan Silchar-a awm Roman Catholic sister zinga an hotu pakhat chuan min rawn bia a. Ka lehkhabu ziah ngaihnawm a tih thu a rawn sawi rualin ka tihsual lâi nia a hriat a rawn sawi a.
A dik lo lâi nia a sawi chu ka han en a, ka phu zawk a ni ber! Awih harsa ka ti ngei mai. Han awih lo dâwn ila a sawi dik miau si. Ka chhiar nawn a, ka chhiar nawn leh a. Ka lu thak lo pui chu ka hiat a, sawi tur reng reng ka hre lo.
Kha lehkhabu ka chhuah dawn khan uluk viau mah ila tihsual a la awm ang tih chu ka ring a. Mahse ka tisual nia a hriatna lâi tak chu a chhung thu khaikhawmtu, keimah pawhin ngaihnawm ka tihlai leh ka chhiar zin pâwl, vawi sawmhnih vawi sawmthum ka chhiar nawn lâi a ni. A thu ngaihnawm lo lâi leh a ziaktu ngei pawhin ka chhiar that peih mang loh laiahte chuan lo tisual pawh ni ila a la ziaawm deuh tur; ka chhiar tam ber leh ennawn zin ber phêkah kher ka tisual chu hrilh a hai duh ngei mai.
Hei hian mahni thil tihsual inhriat chhuah harsatzia min hriattir a. Zirlai ropui tak ka zir chhuah phah ta zâwk a ni. Ka lehkhabu ziaha ka ennawn zin ber lâi, a thu ngaihnawm lâi, ka uluk lâi ber leh a chhiartute thinlung pawh hneh ber tura ka ngaih laia ka tisual a nih chuan hmun dangah phei chuan ka va tisual nasa dâwn em ka ti ka ti mai a. Mahse a bu chhung chu ka han ennawn leh a, hmun dangah chuan tihsual chu ka lo nei leh vak lawi si lo.
Ka thu ziah sual min hrilhtu hnenah hian lawmthu ka sawi a. Lehkha ziakah kher lo, mihring nunah hrim hrim pawh hian hre lova tihsual a lo tam thei hle dawn niten ka hre ta a. Ka ennawn peih mang lohna laia tisual mang si lo va, ka endik zin ber phêkah zâwk ka tisual a nih chuan nun kawng dangah pawh hian kan felna lâi ber nia kan hriat, experience nei tam tawha kan inhriatna lâi, mite pawhin min entawn se kan tih lâi tak hi kan chak lohna lâi, kan tihsual tamna lâi tak leh mi pawhin min tei theih lohna lâi tak a lo ni thei dâwn a nih hi ka ti ta a ni.
Vawikhat chu pa pakhat hi Seventh-day in pakhatah a lêng a. A in neitu ber chu a lo awm lo va. Lo nghah a ngâi si a, a hnua a sawi danin tihtur dang vak awm ta lo chu nghah pahin mei a lo zu .......... veng veng mai a ni awm e. Nakinah chuan a neitupa chu a rawn haw a. Meizial rim a han hria chu, “E heu, meizial rim a va nam ve? Kan in hi mei zûkna tur a ni hleinem. Kan in chhûngah mei kan zu ngai lo,” a rawn ti vei khar khar a. Chu pa chuan a sawi zel danin, “Ka hrilhaiin nuam lo ka ti khawp mai a. Ka zak bawk si a. He pa inah (Seventh-day inah hrim hrim) hi chuan ka lêng tawh miah lo vang ka ti hial a ni,” a ti.
Seventh-day ina meizial a lo zu mai kha thiam a inti bik lo; pawi pawh a ti a, fimkhur lo pawh a inti viau awm e. Mahse thiam lo a intih rual khan a lenna ina Krista hmangaihna hmêl a hmu lo lutuk kha a khawngaihthlâk zâwk a ni.
He thu min hrilh zo chu ti hian ka ngaihtuah zui a, “Zûk leh hmuam tih loh hi thil tha tak a ni a. Ti lo tura mite zirtir pawh kan tihtur a ni. Mahse thil tha nia kan hriat pawh hi Krista hmangaihna hmêl hliahtu a lo ni ve reng thei dâwn a nih hi,” tiin. Kan felna lâi tak hi midang tâna hnawk lâi tak a lo ni reng thei em? Ka hre thiam bik chiah lo fo.
