Chawlhni hi mihring tana siam, Lalpa Pathian engkim siamtu kan biakna ni leh kan lei lam hnate kalsana kan hahchawlhna ni tur a ni tih Lal Isuan chiang takin min hrilh a. Adventist-te chuan hei hi chiang takin kan hre theuh a, kan titha thawkhat hle. Amaherawhchu, kan chawlhni hman dan hi inenchian a ngai ve fo mai thei! Tuna kan chawlhni hman dan tlangpuiah hi chuan chanvo ngah deuh tan phei chuan chawlhna ni ni lovin; hahna ni a ni thei tlat a ni.
Thlasikah chuan 8:45am hi a la hma hle a, 8:45am-ah Sabbath School dar hmasa a ri a, 9:15am-ah Sabbath School kan tan thin. Divine Service hi a tlangpuiin 12:15pm velah kan bang a. Thusawituin a tihfuh loh tum leh Programme inchherchhuan a tam tum phei chuan 1:00pm hian kan thleng thin. Chawhnu lamah 2:00pm-ah AY/AJY inkhawm kan tan thin. A changin 3:30pm-ah kan bang a, a chang chuan 4:00pm pelh rawk chang kan nei fo bawk. Eng emaw changin AY inkhawm banah zaipawlin hla an zir leh thin bawk.
A chunga kan chawlhni hun hman dan khi ngun taka ngaihtuah chuan a khat ten tawn hle. A thente chuan chawlhni kan hmang tha nge nge alawm kan ti mai thei e. Amaherawhchu, Isua, chawlhni siamtu meuh pawh khan kan hman dan ang hi chuan a hmang lem lo niin Bible kan chhiar chuan a lang tlat. Inhmuam up taka awm nilen hi mi tam zawkte chuan kan tlin lo. Thalaite inkhawm nin chhan leh biak ina an tawng nasa lutukte pawh hi a chhan a ni thei mai thei a ni. Tuna kan chawlhni hman dan hi chu thalai tam zawkte tan chuan a hahthlak hle niin a lang.
