2004 kuma film chhuak Troy kha kan en vek tawh awm e, David Benioff-a ziak niin Wolfgang Petersen’n a direct a nih kha. Trojan War hmuhnawm tak kan hmu a. Brad Pitt kha Achilles niin Myrmidons hruaitu ber kha a ni a, Orlando Bloom/Paris khan Sparta lal fanu Helen kha ngaizawngin an han ru chhuak a, Troy khuaah an hawn a, kha vang khan indona nasa rapthlak a rawn thleng ta a nih kha.
Trojan Horse
An han indo a, Trojans lam khan kulh an neih that em avang khan Spartan tan khan luh a harsa, chuvang chuan an tlawm titih ta a nih kha. Mahse fin phakar chhuahin an hawng der a, Trojan Horse kha an hnutchhiah a, Priam, Troy lalpa khan ngaihhruihna thilpek emaw a ti, chutih laiin Paris erawh kha chuan hal darh vek turin a ti a. Mahse apa chuan Troy khuah chuan a lalut ta tho thova, Chu Trojan Horse chhungah chuan Achilles te chu an lo tawm a, zanah an inrin loh laiin an run ta thut a nih kha, tichuan Sparta chuan Troy chu rapthlak takin a hal darh ta a !!
Trojan Horse Setana hmanrua !!
Hetiang chiah hian keini Kristiante pawh hian hmelma pa beihna kan tawk thin. Kan nitin khawsakna ah hian setana hian thil duhawm leh lawmawm tak tak min rawn tawktar thin. A then chu sum thianghlimlo a nih laiin a then chu zu hmun hlimna leh mipat hmeichhiatna hman khawlohna te a ni bawk a. Hengte hi han en mai chuan an itawm thin em em, kan nuna lakluh a chakawm ngawt thin bawk.
Kan ban phak maiah a rawn dah ta a, lakluh kan duh ta, chutah keimahnia Thlarau Thianghlim awm Paris-a khan hal darh vek turin min ti, mahse ngaithla duh lovin kan lalut lui ta a, tichuan nuam kan chen a, kan hlim a, nileng thak thakin kan lam hual ve ta a. Chutah kan thil tha lo lak luh chhunga Achilles-a leh a hote (setana leh a hote) chuan kan rinna a pan ber lai chuhin, kan inrin loh lai chuan min rawn bei ta thut thin a ni.
Tichuan nasa takin min ching phar ta a, keimahnia Pathian in kan lo din te pawh chu an hal darh ta a, kan thinlung chhung leh keimahni chu nasa takin mei anga halin kan thinlung chhung chu na takin min hliam a. Thlarau thianghlim thurawn kha lo ngaipawimawhin kan in chhungah khan lalut lo ta ila chuan kei leh ka nupui fanaute kan him tur a ni a! Tichuan kan harh chhuah meuh chuan kan lo tlai mah mah tawh thin si.
Chuvang chuan heng Setana free gift l^k chakawm tak takte hi i thliar thiam ang u, chuti lo zawng Troy film ang khan ka thinlung TROY chu hmelma pain luhkhungin a hal darh ve palh ang e.
