Hnathawktu
Hna thawh tur mahni zawnah kan nei theuh va, hna thawh tur nei lo, nutling patling nih si chu thil chakawm lo tak a ni awm e. Mahse, hna duh, thawk duh si lo an awm an ti. Sawrkar leh Private firm-ah te hna a awm chuan dil ve thei zel- thawk tura an lak a thawk tha peih mang si lo an awm fo thin. Ringtute tiha chuan a mawi lo hle.
Hna kan thawh hian kan thawh dawn leh kan thawh laia kan rilru put hian kan hna thawh a tinuamin a tihrehawm thei. Peih lo chunga kan thawh chuan kha hna kha hna hrehawmah kan siam a, keimahni leh keimahni kan inhrem tihna mai a ni. Phur taka kan thawh thung chuan hna hahthlak tak pawh hi hlim takin a thawh zawh thak theih a ni. Peih lo chunga thawh hian thawhpuite sawisel leh dem mai a awl duh khawp mai.
“Hna zahawm leh zahawm lo chu a thawktuin a zah leh zah loh azir a ni mai,” tiin an sawi thin. Eng hna pawh thawk ila a thawktute’n zahawm taka kan thawh a, rinawm taka kan thawh chuan hna zahawm a ni mai a. Hna ropui tak pawh thawk ila, zah lo tak leh ningnel deuha kan thawh chuan hna zahpuiawm tak a ni daih thei a ni.
Pathian hna kan thawh hian, hlim tak leh phur takin nge kan thawh a, “Nakum lamah chuan pha tawh teh ang, a hahthlak em mai!” ti rilru chungin kan thawk thin le?
Kan eizawnna hmuna kan thawhpuite hian phunchiar min ti nge kan bula hna thawh nuam an ti? “Ani awm achinah hian kan boruak a nuam lo vek,” tiin kan chanchinte hi an lo sawi a nih chuan, kan lanchhuahtir tur eng chu kan lanchhuahtir lo a ni ang. Pathianin ama tana thawk tur leh kan mihringpuite hnena malsawmna thlen turin min duh a ni tih hre reng chungin hlim tak leh phur takin kan hna theuh i thawk ang u.
