~Upa S. Lalkamlova
Kan ni tin nunah hian tawngkaa a ri-a thusawi hian hmun a chang thuk hle a. Biak-ina kan inkhawm pawhin thusawitute leh thupuangtute hnen atangin mipuiin thu kan ngaithla thin a ni. Thu kan sawi chhan leh thu kan puan chhan chu ngaithlatu mipui an awm vang a ni. Tichuan, mipui hriat tura thupuangtu leh a lo ngaithlatu chu an pawimawh ve ve a. Thusawitu emaw thupuangtu emaw chuan a ngaithlatu mipui pungkhawm chu a ngai pawimawh a nih chuan hriat theihin thu a sawi a ngai a ni.
Biak inah emaw, puipunna hmun dangah emaw, a huho leh malzai te kan ngaithla fo thin. Heng hmunah hian zai ri leh rimawi a inchawih chuan ngaihthlak a nuam a, Pathian biak a tinuamin a tizahawm thin. Hla thu luahlan hial khawpa rimawi (musical instrument) a rin lutuk chuan lung a tizingin, min timangang hial thei a ni. Mi tlemte punkhawmna hmuna music ring tak taka play te, ring tak leh rang zeta thusawite a inhmeh lo chauh ni lovin, a ngaithlatu lam tan ninawmah a chang hial thei.
Mipuiin a huhova Pathian kan biakna hi a lo hlimawma, a lo phuisui zawk nan thusawi kawngah te, rimawi hman thu-ah te leh, aw kan hman dan hrim hrimah te hian hma kan sawn a hun ta hle mai. Pathian malsawmna a zarah Biak in mawihnai zawk deuh te kan nei ve ta a. A chhunga inkhawm, member kal khawmte pawh kan lo changkang ve hret hret zel a. Heti a nih lai hian Biak in chhunga kan khawsak duh dan te, kan thusawi leh kan zai honaah te hian a tha zawngin hma ka sawm em? tih te hi inzawt thin ang u.Thangthar zawkte pawh hian Pathian biaknaa kan chanvo kan hlen that zawk theih nan hmasawn i tum ang u.
Chawlhni a lo thlen a, Pathian be ho tura Biak-ina ringtute kan pungkhawm thin hi a lawmawmin, a ropui tak zet a ni. Heti ang huna chiang leh fiah deuh a thu puan leh sawi ngaihthlak tur a awm chuan a lawmawm a; hriat hleihtheih loh leh chiang mang lo zeta kan sawi erawh chuan mahni leh mahni kan intei te tihna a ni thei hial a sin.
Kohhran mite inneihna
Kan hriat angin tunkar nilaini khan Kan member chuan kohhran mi pasal a nei a, karleh lawkah kan member vekin adventist nula a nei leh dawn a ni a, inneihna hi kan chawimawi a, la innei lote pawh Kohhran dan thianghlima an inneih theihna tura kohhranin hma kan lak a pawimawh hle mai. Presbyterian kohhran chuan dan anga inneite an chawimawiin, dan anga innei nei tam kohhran nih tumin an tang nasa hle. Kohhran dang anga innei zat leh dan 2-naa innei zat an chhinchhiah thlap a, kum tawpah kohhran hmunpuia report an pe thin. Keini kohhran pawh hian hetianga a tha zawnga hma laka inelna neih hi a tihchi hlein a rinawm.
Kan kohhran Seventh-day Adventist thalaite hi kum 2011 chhung hian Kohhran dan thianghlima innei engzat nge awm a, Kohhran dan thianghlima innei lo, inru leh Mizo dan hmanga innei ta mai mai engzat nge awm tih hi hre ta ila khawi nge tam zawk ang a, engzatin nge a inthlauh ang tih hriat tum ila, chuta tang chuan rawngbawl zel dan tur pawh a hriat deuh ngei ang le.
