Georgi Kertikov chu ringlomi a ni a, Bulgaria rama awm a ni. Nu pakhat ina a electric khawl chhia siam tura koh a nih lai chuan chu nu chuan biak ina inkhawm puiah a sawm a, chu sawmna chu a hnar chuan a thilchhia a siamtir duh tawh loh takin tiin a inkhawmpui ve mai a.
Sabbath School class-ah chuan Thupuan bung 13-a sakawlh chugchang an zir ni tak a lo ni a. Georgi lah Chinese hmanlai thawnthu tuipui tak mi a lo ni a. Insual chanchin te, infiamna lam chanchinte a tuipui zawng tak a ni bawk a. Thupuana Dragon leh Sakawlh chungchang chu a ngaithla ngun kher mai. Indo te, thisen te leh dragon chungchang sawitu kohhran chu a kohhran duhzawng tak a nih ringin a inkhawm chhunzawm ta zel a, kum 2 hnuah chuan baptisma a chang ta nghe nghe a ni.
Georgi chuan nupui te a nei a, tichuan Global Mission a rawngbawltu ni turin Bulgaria thingtlang khaw lian vak lovah koh a ni ta a. Bible study Group 3 din a lo ni tawh a. Bulgarian group chuan member 5 an nei a, Turkish group-in ngaihventu an nei nual naa member chu an nei chiah lo va. Romani (gypsy) group chuan ngaihventu mi 7/8 chu an nei naa member an nei bik lo. Georgia chuan thla 18 chhung rawng a bawlpui hnu chuan Romani mite chuan baptisma an chang ta a ni.
Georgi chu Bulgaria ram chhim lama awm Chirpan khuaah sawn a ni a. Chutah chuan Romani mi tam vak lo an awm a. Hruaitu an neih loh reng avangin member thenkhat chu an bo hman tawh a. Georgi chuan member-te chu a tlawhkual nghal a, chutia rinna phatsan tawhtute pawh chu tlawh chhuak zel turin a fuih bawk a. Georgi Romani chu a ni lo naa Romani mite chu intlawhpawh tawn nuam ti tak leh chhungkhat laina te inkungkaihna ngai pawimawh tak an ni tih a hre thuai a. Member-te tlawh a, member intlawhtawn tura fuih chu thil tih tur hmasa ber niin a hria a ni.
In chhung bungraw siam leh electric hmanraw siam lama a talent neihte chu thian siam nan a hmang a. Natna avanga chesawn thei lote tan chetsawn theihna hmanrua a siam sak a, sakawrin a kawngkhar a tlawh chhiatna nu pakhat pawh a kawngkhar a siam that sak mai a, a thawh pah chuan Pathian thu a hrilh zel mai a ni.
Georgi chuan Kohhran member ni sate chhungte ringlomite chu ngaipawimawhin, chhungkaw inhmuhkhawmna hun a siam sak a, picnic te, infiamna hun te, computer zirna hun te a siam sak a, tichuan Krista chanchin a hrilh thin. Thalaite chu computer a zirtir tan nan typing a zirtir a ngai a, chutia typing an zir nan chuan Turkish tawngin Pathian hla bu te a siamtir a, chung chu biak inah te an sa thin.
Georgi hian a hna hi nuam a ti em em a. Thian siam nuam a tiin Krista a hmangaih a ni tih hi midang hnenah sawi nuam a ti em em bawk thin. Chanchin buatsaih lai hian mi 30 baptisma chang turin a buatsaih mek a. Krista hmelhriattir tumin thian eng emawzat a ziam mek bawk a ni.
Kan thawhlawm hmangin heng Missionary-te hi kan tanpui ve thei tih hriain thawhlawmte hi ui lovin Krista hmangaihna hre lo ten an hriat theih nan i thawh thin ang u.
Krista chu a lo kal thuai tawh dawn a, Khawvel ram tina a hmangaihna thu hril turin min tir a, hmun kilkhawr leh ram hlaah kal thei vek lo mah ila, tawngtaina leh thilpek hmangin rawng kan bawl ve thei a ni.
