WOMEN’S MINISTRIES INKHAWMPUI REPORT
~Lalrampari
Aizawl Bial Women’s Ministries inkhawmpui vawi 8-na chu Zawlnuamah hlim taka neih a ni ta a. November ni 4, 2010 zing dar 7:00-ah Sairang kawng, tawngtaina hmunah innghak khawmin Bus pali (4) leh Sumo leh Motor kengte nen Zawlnuam panin kan chhuak a. Khuang nen kawngtluanin hla sa chungin kan inawi thla a. Rawpuichhip daiah kan chaw pai te eiin kan kal zel a. Dar 3:00 hma deuhin Zawlnuam chu kan thleng a. mi pahnih khat motor chuang sual chau deuhte awm mah se kan hlim tlang hle a ni.
Tualchhungin Registration an lo buaipui a, mikhual 204 leh langa kal 20 vel kan awm a. Khaw hrang hrang 33 atangin kan kal khawm a ni. Khaw lum lutuk a ziaawm deuh tawh a, mahse tui a tam bawk a, kan inbual ni tin mai. Zawlnuam Thuampui veng Community Hall-ah kan inkhawm a.
Tan zan atangin thusawi a tha em em a, thusawitute reng reng an inbuatsaih nasa tih a hriatin an thusawi a nung a. Thupui, “Pathian hnaih hi a tha a ni,” Sam 73:28 hmangin rilru khawih leh mi hneh tak tak an sawi a. Zoram Danial Pawl Chhantu Chairman, Pu Vanhmingliana pawhin, “Rawmawl a hun rengin mittui min sentir tam hle,” a ti hial a. Zai a nuamin kut bengin hlim takin kan zai thup reng mai a ni. Seminar-ah pawh Pu Vanhmingliana’n Paper a buatsaih a present a, sawi hona pawh kham lo takin kan nei a ni.
Report kan ngaihthlak atangin khaw tina kohhran khaipate hi hmeichhia te an lo ni deuh vek emaw ni tih theih turin an hnathawh report a ropui a. Inkhawmpuiah pawh thusawi a ni emaw, report pek a ni emaw, dinpuitute an ni emaw chanvo changtute an fel hlawm hle mai. Khawkhat hruaitu ni awm tak takte an ni reng a ni. Palai hi hmeichhiat chauh kan ni lo va, mipa pawh 30 vel, Bialtu Pastor Zirlawma telin an awm a ni. Kan Women’s Ministries Director Pi Nunthari pa, Pu Biakchhunga kum 88 hmang tan mek pawh a lo tel ve a, ani hi inkhawmpui kal zinga upa ber lawmman, Adventist Hla bu kan pe nghe nghe a ni. Mipa kalte hian an sawi chu - Chapo leh tu huatthu emaw lo ni lo se, “Danial pawl inkhawmpui aiin a nuam zawk,” zu tia maw le! Thlarau Thianghlim a tlangnel niin a lang thei bawk.
Zaipawl leh zaia rawngbawltute’n hma an sawnin an zahpuiawm lo khawp hlawm mai. Kum dang chu kan khum hle a ni. Republic leh Central Kohhran zaipawl an fakawmin an thiam a, an inbuatsaih nasatzia an hla sak nung tak atangin a hriat theih. Pathian an pawl nasa hle ngei ang. Zaipawl Member 39 vel rual nu valai, nula te pawh telin an han zai a, harsatna nei lo chu an ni bik hauh lo ang le! An theih tawp Pathian tan an phal a ni zawk. Rualawh a na duh hle mai.
Thurel hrang hrang zinga pakhat chu - December thla chhung ngei hian Chhandamna Camping neih ni rawh se tih a ni a. A neihpui turin Kross Thuchah Puangtute ni se tih a ni bawk.
Inkhawmpui hlawhtlin nana theih tawp chhuahtute: Hruaitute leh midang leh Zawlnuam Kohhran hote an fakawm hle. Zawlnuamah hian chhungkaw 4 vel chauh an awm a, hetiang inkhawmpui an thleng thei hi tluk loh an nihzia a lang. A bik takin Pu Durthanga te chhungkua leh Pu Laskara (Pi Luri) te chhungkaw inpekna a nasa a, kan vai deuhthawin min mikhual a, Biak in bulah ei rawngbawl a ni a, eitur hnianghnar leh tui kan nei a. An lo inbuatsaihna leh inpekna kan fak takzet a ni. Evangelist Lalduhawma te chhungkua an fakawm hle bawk. Antangkai hlawm hle mai. An inpekna leh thawhrimna te Pathianin a let tam takin vur se tih hi kan tawngtaina a ni.
November ni 8 zing takah kham lo tain Nakuma inkhawmpui lehna tur thlirin mahni khaw lam kan pan ta hlawm a. Kawng tluanin hlaa Pathian pawlna nen inkhawmpui leha inhmuh leh hun thlirin kan inthen ta hlawm a ni.
