EDITORIAL
Kan tawngkam hi
Tawngkam kan hman thinte hi ngun taka ngaihtuah a lo pawimawh hle mai. Committee-naah te, then leh rual kan kawmnaahte hian, kan thusawi hretute khei deuh salh leh chhun deuh ngaiha thu sawi nuam kan tih riau chuan, kan chapo viau emaw kan fing tawk lo hle emaw a lo ni daih thin. Thenkhat chuan mi thinlung tihnat an duh vang leh mi huatthu sawi an tum vang pawh ni lem lovin, mi rilru an hliam fo. A chhan chu an tawngkam hman an fimkhur tawk thin loh vang a ni thin.
Rawngbawltute hi mi hmaa thu kan sawi hian, mi thinlung tina tur tawngkam dengkhawng kan hman fo chuan inenfiah a, ngaihdam dil a lo tul a nih pawhin dil mai tur kan lo ni.
Hla phuahtu chuan “Tawngkam tha ka hman thinte hian nun thim a tihen theih chuan, lawm hla saa ka zai riin ngui a chhawk zan phawt chuan siam thatna thu sawi thei turin Aw Lalpa min pui rawh,” a lo ti a. Hmangaihna kan lantir avanga mi nun kan tihhlim theih chuan kan theihna te a tha lama hmangin Krista tan kan thawk thei a ni. Kolossa 4:6 “Mi tin engtia chhan theuh tur nge tih in hriat theih nan in tawngka chhuak chu, chi al, khawngaihna tel ni fo rawh se,” tiin Tirhkoh Paula chuan tunlai ringtute hi min lo chah a ni.
“Vawiinah mi rilru ka tina a nih chuan Lalpa min ngaidam la. Naktukah chuan mi rilru tina lova ka hun ka hman theih nan min pui la, i hmangaihna puangtu ni zawk turin Lalpa min pui ang che,” tih hi zan tina kan tawngtaina ni se Kohhran hi kan hlim sawtin a rinawm a ni.
