Kan Va Lawm Tak Em!~Upa Ramengmawia KawlniSecretary Church Building Committee

7th Day tlang atanga Zotlang Kohhran kan indanna kum 6 lai a lo ni ta reng mai! Hei leh chen Lalpan min puihna leh kan nu leh pa 7th day tlang Kohhran min uapnaah lawmthu kan sawi bang lo.
April 30, 2011 Sabbath zan hian kum 6 zet kan sak tawh kan biak in fellowship hall-ah in chhunluh kan tum a, chu mi tur chuan thil tul hmasa ber a tam em em a, ek in leh zun in, Electric Wiring, rawng hnawih - heng pathum hi thawh hmasak ber tur vek an ni a, pawisa a heh hle lehnghal.
Kan Kohhran sum bawma pawisa awmin a daih tawh si lo va, a hun lah chu a ni telin a hnai tual tual bawk si. Committee lu a hai hle mai a. Keimahni kan insawrfu hle hnuah kan nu leh pa 7th day tlang kohhranah sangha zawrh kan rawtthlu ta. Church Board-ah kan duhnate kan thlen a, Church Board-in sangha zawrh chu min remtihsak a, Carol erawh chu “a timing lo” min tihsak a ni awm e. Mahse, sangha zawrh mai kan duh tawk lo tlat bawk si! Carol lovin kan nuho an lng chhuak a, kan mi thilphalte an rawn lenchilh che ua, (Carol ni chiah si lovin) cheng tam deuh in lo pe kha kan lawm takzet a. Thilpek min petute hming han tarlan vek kan duh ngawih ngawih laiin a remchang chiah lovin kan hria a, kan tarlang ta lo mai a, min lo hrethiam mai ru.
Sangha kan zuar a, sangha min leisak lote pawhin kan hlep tur aia tam te min lo pe a, a thenin kg 1 cheng 500/- ten min lo leisak bawk a. Kan va lawm tak em! Kan lawmzia kan thupbo phal lo vam Ay Kantu kaltlangin kan han puang chhuak a ni.
Biak in sak nana sangha min lei saktu leh pawisafai min petu zawng zawng leh Ay Kantu chhiartu zawng zawngte April 30, 2011 Sabbath zana biak in kan luah tan zanah min rawn inkhawmpui vek tur leh in biak in sak, a hmun ngaia rawn hmu turin Zotlang Kohhranin kan sawm vek a che u.