Tun hma deuh kha chuan Adventist-te hi lehkha thiam, sap tawng thiam kohhran niin kan inhre thin. Kan hotute lah kan ngaisangin tu el phakah mah kan dah ngai lo. "Saisu ang mai kan ni a, kan thleng ril tulh tulh a, kan lian tual tual," kan ti thin a nih kha. A ni reng tak a, kha tih hun lai kha chuan keimahni tawkah kan dinhmun a chhe lovin kan induh tawk ve viau pawh a lo ni mai thei. Khatih hun lai dinhmun nena khaikhin phei kha chuan tuna kan dinhmun hi chu sang tak, kan hotu mual liam tawhte duhthusam leh suangtuahna piah lam ram kan thleng hial tawh pawh a ni mai thei a ni.Tun hma ai chuan kohhranin tih tur leh ngaihtuah tur, buaipui tur leh hmalakna tur hna peng hrang hrang pawh a ngah tawh hle mai. Amaherawhchu, vawiin thleng hian Mizoram hmun tin deuh thawa Adventist-te zingah kohhrana mawhphurhna leh chanvo kan neih angte zah leh hlut thiam kan la awm meuh lo mai hi chu a mak tih loh rual a ni lo. Adventist kan nih ang hian Isua lo kal tur hi kan nghakhlel lova, kan phur lova, kan tui hek lo. Kan lo nih ve lak lawh tawh avangin a hmingin kan ti ve mai mai niin a lang. Pathian thu tak tak han khel leh buaipui pawh kan peih chuang lo. Hei hi kan nihna a ni tlat, zep rual a ni lo. Mi thahnemngai mi tlem te te avangin kohhran pawh hi a kal tawk tawk a ni ber. Kan tun dinhmunah chuan Local Church leh Mission-ah pawh mihring hman tlak leh chhawr-nahawm tlakchhamna a nasa ta tial tial. Kan inpekna lah a pawnlang sawt em em a, kan chhehvela kohhran dang unaute inpekna te nena khaikhin phei chuan kei ni hi chu kan hniam tak zet a ni. Tun ang zel a kan than chuan, thawktu mihring inthlahdahna leh tl^kchhamna avangin kan nih tur ang kan ni pha dawn lova, kan kova mawhphurhna hi midang kovah nghah a la tul ngei ang. Chuvangin Isua nun en chungin, Pathian Thlarau Thianghlim tanpuina zarah kohhran hian Revival leh Reformation chu a neih ngei hi a tul takzet a ni. Tum khat chu Artist ropui tak, Michael Angelo khan Mosia lim hi lung atangin a chher a, Mosia la hmu miah lote pawh khan Mosia ang an ti em em mai a. Michael Angelo hnenah chuan "Engtin nge hetiang hian Mosia lem i chher chhuah theih" tiin an zawt a. Ani chuan, "Lung atang khan Mosia ang lo lai apiang ka kher thla zel a, tichuan hetiang hian a lo chhuak ta a ni," tiin a chhang an ti. Hetiang deuh bawk hian, kan kristian nun kawngah hian keimahnia Krista ang lo lai apiang hi paih thla ila, sak deuh lai a awm a nih pawhin kheng thla ngam ila, a khen thl^kna hmanrua pawh hriam deuh a ngaih tum a awm ngei ang. Isua nun nena inang lo lai apiang kan tihthlak ngam chuan keimahniah Krista nun mawi chu a lo lang ang a, hun hnuhnunga kohhran mamawh ber harh tharna leh siamthatna chu kan chang thei dawn a ni.
