Incheina
Eng emaw lai atang khan thalai (a bikin mipa tleirawl hovin) necktie awrh chunga kawr (kamis) thun (tuck) lo va Biak ina inkhawm an ching a, hetianga inchei hi tunhma te kha chuan incheina mawi taka ngaih a ni lo va, inchei hmuh tur pawh hi an awm ngai lo. T.V. kan en nasa a, milarho incheina kan lo copy ve thin niin a lang. Necktie awrh chunga kawr thun loh pawh hi tunhnai lawk khan sap rama zaithiam thenkhatin an rawn ching thara, chu chu thalaite’n an lo copy ve a ni ngei ang. A pawi em em na sawi tur phei chu a awm lo pawh a ni mai thei, mahse Biak ina inchei nan a pawmtlakah kan ngei em tih hi inzawh a ngai kan ti em?
Heng an incheina kan copy hote hi mi lar, celebrity kan tih te an ni a, mi mit la tur leh incheina danglam deuha inchei chu an thupui ber pakhat a ni, a chhan chu celebrity an ni miau a. Mipui chawh hlim kha an eizawnna a nih avangin an tan chuan a tulna chen pawh a awm ang. Amaherawhchu anni ngei pawh hian a hun leh a hmun chu an thliar thiam hle. Hman ni lawka zaithiam lar Michael Jackson-a vuina-ah te khan danglam taka inchei hmuh tur an awm lem lo, mi lar tam tak kalkhawmte kha formal takin an inchei thap mai a nih kha. A hunah chuan smart takin an inchei thin tih kan hriat a tha khawp mai. Tunlaia zaithiam Lady Gaga an tih pawh hi Britian Lalnu a hmuh dawnin pangngai taka inchei turin an warning a ni awm e.
Ngaihpawimawh tul kan ti lem lo a nih pawhin; nakin lawkah thalai inkhawma chanvo neite leh inkhawm hun danga tantu leh fak hla satute, thusawitu hial te pawh an la ni ang; necktie awrh chunga kamis thun lovin inkhawm te min la kaihruaiin, Pulpit-ah rawngbawlna thianghlim te an la nei dawn a nia (tuna kan thalaite hi nakin lawka kohhran ban turte an ni si a). Chung hunah chuan kan ngaimawh ang em?
